KHAWTHLIR

KṬP-in thisen pe

KṬP, Dawrpui Vengthar Branch chuan nimin khan an kohhran hall-ah thisen pek huaihawtin, Synod Hospital tan thisen unit 34 an pe a, petute mipa 33 leh hmeichhia pakhat an ni.

Bûk turin hriattir

Mamita Legal Metrology controller Saizikpuii chuan thuchhuah siamin, iron rod zuarte chu an rod zawrhte bûk ngeia hralh turin a hriattir. Controller chuan, "Iron rod zuarte chuan an thil zawrhte bûkna atan electronic weighing machine an kawl ang a, heng bûknate hi Legal Metrology-in an endik leh certificate an pek chauh an hmang thei. Bûknate hi customer-te endik an phal tur a ni a, bûk tling chauh an pe chhuak tur a ni," a ti.

Chhiatna a thlena chêt lak dan zirho

Hnahthial DC conference hall-ah nimin khan chhiatna a thlen palha chêt lak dan tur inzirtirna buatsaih a ni a; khawtlang hruaitute mawhphurhna, first aid, State Disaster Response Fund leh Disaster Risk Reduction chungchangte an zirho. Zirhona hi Police, Excise & Narcotics, Hnahthial College NCC, Quick Response Team, Hnahthial khaw chhung leh pawna YMA branch aiawh leh Village Disaster Management Committee aiawhte pual a ni.

DC-in hlâng hlan

Lawngtlai bawrhsap Donny Lalruatsanga chuan nimin khan Central Young Lai Association hnenah hliam/ruang zâwnna hlâng (spine board stretcher) pahnih a hlan. Hlâng hi Strengthening of DEOC Fund aṭanga lei a ni a, kg 159-a rit dâwl zo a ni.

Lak luh khap

Mamit DC Suvigya S Chandra chuan thupek chhuahin, Mamit district-ah Mizoram state páwn leh ASF hri lênna district/khua aṭanga vawk, vawksa rêp leh vawksa aṭanga thil siamte lak luk a khap. Vawk damlo neite chu a rang thei ang bera District Veterinary Hospital-ah emaw, mahni khuaa VFA/VC-te hnenah emaw hriattir turin a chah bawk.