PHE-in hna kan thawhin, mipui harsatna thlen tlem tura ruahman a ṭul - Lalnilawma

Public Health Engineering department hotute nimin khan PHE minister Prof. Lalnilawma pisaah department hnathawh kal mekte leh Aizawl mipui tana tui sem dan an thlir. Minister chuan, PHE department-in hna an thawhin, mipui tana harsatna thlen tlem thei ang bera inruahman a ṭul thu a sawi.

Ṭhutkhawmah hian PHE department hmalakna kal mek leh thlen chin te, Aizawl tana Tlawng lui tui lak chhuah dan te, harsatna an tawh te, Aizawl veng hrang hranga tui sem dan te, tui harsatna sutkian dan turte sawiho a ni.

PHE Minister chuan, "PHE department-in hna kan thawhin, mipui tan harsatna thlen tlem thei tura ruahmanna kan siam a ṭul. Kan hnathawhin mipui tan remchan lohna a thlen dawn a nih pawhin, mipui hnenah information mumal rang tak pe ṭhin ila, hetiang kawngah hian khawtlang hruaitute leh NGO-te nen thawhhona ṭha kan siam thiam a ṭul," a ti.

Mipuiin tui thianghlim ṭha taka an dawn theih nan PHE-in theihtawp an chhuah tih sawiin Lalnilawma chuan, "PHE hi mipui tana thawk kan nih angin, Minister tiamin tumah kan inthlahdah a thiang lo, mipui kan ngaih pawimawh a ṭul," a ti a; ruah a sûrin Aizawl châwmtu Tlawng lui nasa takin a nu ṭhin a, chu chuan tui sem a tih-khaihlak ṭhin thu a sawi.

Prof. Lalnilawma chuan, tui pump leh tui semah te, mipui nghawng tur thil harsatna a awm chuan mipui hnenah hrilhtir vat zel turin PHE officer-te a chah a, "Section tinah emaw, veng tinah kan tui sem theih hun tur information mumal tak kan pek a ṭul a, tui sem kawngah harsatna kan nei a nih pawhin, kan harsatnate a rang lamin mipuiah information kan pek vat zel a pawimawh," a ti.