KHAWTHLIR

BSP-in thisen pe

Border Security Force (BSF) 92 Battalion, Lunglei Zotlang leh 152 battalion, Melte-te chuan nimin khan Lunglei Civil Hospital-ah thisen unit riat an pe.

Thuthlung ziak

Ex-Servicemen Contributory Health Scheme (ECHS) leh Aizawl Hospital & Research Centre chuan nimin khan thawhhona thuthlung (memorandum of agreement) an ziak. ECHS hi sipai châwl tawhte leh an chhungte damdawia an inenkawlna atana duan (scheme) a ni a; thuthlung hnuaiah hian Aizawl Hospital-ah ECHS member-te chu pawisa pe loin (cashless) enkawl an ni dawn a ni. ECHSah hian sipai châwl tawh leh an chhungte mi 13,000 vel an tel.

Oslo-ah thing phun

69th Commonwealth Parliamentary Conference post tour hmanga Norway tlawhtu Assembly speaker Lalbiakzama chuan September 29, Thawhlehni khan Oslo-a Indian Embassy thar turah thing an phun. Speaker hi Norway-a Indian ambassador Gloria Gangte leh Embassy-a thawkte'n an ṭawiawm a ni.

RTI Online

Mizoram RTI Online 2.0 chu hman theih tura siam zawh a ni tawh a, vawiin hian staging environment aṭanga production environment-a sawn leh hna ṭul dangte thawh a nih dawn. Vawiina hnathawh tur avang hian chawhma dar 10 aṭanga tlai dar 5 thleng Mizoram RTI Online hman theih a nih dawn lo tih Mizoram Information Commission chuan a tarlang.

Police-in meth man

Khawzawl police-te team chuan nimin zing dar 7 vel khan Neihdawn pengṭhuamah scooter MZ-01 AB-8157 aṭangin methamphetamine mûm 44,000 (kg 3.828) an man a; scooter-a chuang R Malsawmthara (35), Champhai Tuipui leh C Vanlalsawma (32), Champhai Mualkawi nia inchhálte man nghalin, NDPS Act hnuaiah thubuai ziah luh a ni.