Certificate Court-in kuminah Thubuai 30 a chingfel tawh

Mizoram Public Demands Recovery Act 2001 hnuaiah hian Certificate Court chuan civil court angin thuneihna a nei a, kuminah MPDR Act tlawhchhanin thubuai 328 thehluh tawh a ni. Aizawl bawrhsap Pisapuia Certificate Court-a thawkte sawi danin, The Mizoram Public Demands Recovery Act 2001 tlawhchhanin certificate officer-in dan hmangin thubuai neite a ko a, ro a rél ṭhin. Kumin January aṭanga November thla tìr thleng khan Mizorama bank hrang hranga loan la, rûl thei lote chungchangah thubuai eng emaw zat a lut tawh.

Loan rûl thei lote chu bank-in thubuai an siamsak ṭhin a, thubuai neite chu certificate officer-in koin a ngaihtuah ṭhin. Kumina thubuai lut 328 zingah Canara Bank, State Bank of India, Maharastra Bank, Mizoram Rural Bank, Mizoram Cooperative Apex Bank, Punjab National Bank leh bank hrang hranga loan la, rûl thei lote thubuai an tam ber. Kumin chhungin bank hrang hrang aṭanga thubuai lutte chu 30 chinfel a ni tawh a; chu'ngte chu Canara Bank aṭangin 12, MCAB aṭangin pahnih leh SBI, Seling Branch aṭangin 16 a ni.

Taxation department-a chhiah pe tur, pe si lote lakah Taxation department chuan thubuai a thehlut ve bawk a, thubuai ṭhenkhat chu kum 2010-a mite a ni tih thawktute chuan an sawi. Taxation hian chhiah an pek loh zat an chhût chhuah hnuah thubuai an thlen ṭhin a, kuminah hian Taxation zone hrang hrang aṭangin thubuai 27 an thehlut.

Certificate Court chuan thu­buai an dawn hnuah thubuai neitute a ko ṭhin a, court rorelna pangngai ang thoin ukil rawih theih a nih angin an ruai ṭhin. Certificate Officer thuneihna pawh civil court-te ang thoin, senior civil judge thuneihna ang a nei a ni.

Certificate Court-a thawktute sawi danin, thubuai rem a nih hnuah thubuai thehluttute'n pawisa an dawng ngei tih fin­fiahna court-a an thehlut a, chumi hnuah tihfel a ni tih chhinchhiah ṭhin a ni. Hetiang tho hian bank-te pawhin loan latute'n an rulhna bank receipt chu Certificate Court-ah an thehlut ve ṭhin bawk.

Kumin kum tìr lama Vanglaini-in Aizawl Municipal Corporation-a RTI Act hmanga information a dilna leh chhanna a tihchhuah tawh, Ch. Saprawnga Truck Terminal (CSTT)-a parking fee khawn hna leh contractor-te'n AMC-a sum an pek luh tur nia sawi an pek loh vanga AMC-in vawi 11 an lo ṭhìn tawhna chu AMC chuan Certificate Court-ah thubuai a thehlut tawh. He thubuaiah hian mi pathum hming a lang a, Certificate Court chuan a la ngaihtuah lo thung.