Muga pangang chi ṭha thawn chhuak

Muga pangang chi ṭha (basic seed) Mizorama siam chhuah, disease-free layings an tih chu state páwna thawn chhuah turin Sericulture director Lalrinawma'n nimin khan a vailiam.

Sorkar thuchhuah tarlan danin, Muga pangang chi thawn chhuahte chu a chi fîr ṭha 27,000 vel a ni a, Narayanpur, Assam leh Rompara, Meghalaya-a khawi pun turin thawn chhuah a ni.

Nipui laiin phai khaw lumah Muga pangang khawi hlawhtlin a harsat laiin, Mizoramah chuan nipui laiin khawi hlawhtlin a ni fo tih tarlangin sorkar thuchhuah chhuah, "Tun ṭumah pawh August thlaah Thenzawl P3 Muga Farm-ah khawi hlawhtlin a ni. Khawi pun zel atan Central Silk Board office, Mizoram chuan Muga pangang tuite a siam a, a siam chhuah aṭanga pangang tui ṭhenkhatte chu phaiah mamawhna a san avangin Assam leh Meghalaya-ah te thawn chhuah a ni," a ti.

Muga pangang bikah Central Silk Board hnuaiah hmarchhak state hrang hrangah pangang tui siam chhuahna unit 14 a awm a, Mizoramah chuan kumin aṭangin unit khat a awm ve ṭan. Hmarchhak biala pangang tui siamna unit 14 zinga tlemte chauhin kumin nipui laiin Muga pangang an khawi hlawhtling a, hlawhtling zingah Mizoram a tel a ni.