8th Schedule-ah Mizo ṭawng a tel theih nan Larsapin ṭan lak a inhuam

Mizo Language Development Board (MLDB) chairman R Lallianzuala leh secretary Lalsangpuia te chuan nimin khan Larsap Gen. Dr Vijay Kumar Singh chu Lok Bhavan-ah an hmu a; 8th Schedule-ah Mizo ṭawng seng luh a nih theih nan theihtawp chhuah a tum thu Larsap chuan a sawi.

Governor chuan, hnam dang naupang, Mizo ṭawng zir tìrte'n dik taka an lam rîk theih dan tur ziak dan zirtir ṭha a tih thu MLDB hotute a hrilh a; MLDB-in lehkhabu a chhuah dawna an thawhpui atan Sahitya Akademi hotute biak a inhuam thu a sawi a ni.

Gen. VK Singh chuan, Indian Constitution 8th Schedule-ah Mizo ṭawng seng luh thuai a nih theih nan theihtawp chhuahpui a tum thu te, Mizo ṭawng hmangtute khawvelah an inzár pharh zau tawh thu te, Mizoram chu India rama ziak leh chhiar thiam tamna ber state a nih thute a sawi bawk.