NESSDU Freshers cum Cultural Meet

Delhi University-a India hmar­chhak zirlaite intèl khawmna, North East Students Society, Delhi University (NESSDU) chuan No­vember 9, Inrinni khan Sir Shankar Lal Concert Hall-ah 7th NESSDU Freshers cum Cultural Meet 2019 ropui takin an hmang a, hmarchhak state hrang hranga zirlai, Delhi-a awm mek 500 vel an tel.

NESSDU Freshers cum Cultural Meet-ah hian Hibu Tamang, IPS chu khuallian a ni a, DU deputy dean (Students Welfare) Dr Somorendro Singh chu khualzahawm a ni. Delhi-a hmarchhak zirlai pawl hrang hrangte an tel bawk.

NESSDU-a Mizoram aiawha tel Lalduhthlana, NESSDU-a orga­nising secretary sawi danin, Freshers cum Cultural Meet-ah hian zirlai awm tharte lawm luhna hun hman niin, hmarchhaka hnam hrang hrangte hnam làm leh zaite entir a ni a; Mizo zai leh inthuamna chi hrang hrangte pawh entir a ni. Lalduhthlana chuan, NESSDU-ah hian Vanglaini chu media partner a nih thu sawiin, an chungah an lawm tak zet thu a sawi.