National Voluntary Blood Donation Day pualin thisen pek rûnpui huaihawt a ni
Nimin October 1 kha National Voluntary Blood Donation Day (NVBDD) a ni a, Mizoram hmun hrang hrangah hman niin, thisen pek rûnpui huaihawt a ni.
NVBDD hi Aizawlah chuan Mizoram State AIDS Control Society (MSACS), Association for Voluntary Blood Donation (AVBD) leh Aizawl College (GAC) te huaihawtin GAC-ah hman a ni a, MSACS project director Dr Jane Rinsangi Ralte khuallian niin, GAC zirlaite leh zirtirtute'n thisen an pe.
Dr Jane Rinsangi Ralte chuan, blood donation camp huaihawta thisen pek ṭhin chu a ropui hle tih a sawi a, chutihrualin, "Camp-ah chauh pe loin, blood bank-ah kalin i pe ṭhin ang u. Thisen kan pe thei a nih chuan kan hrisel tihna a ni, kan hriselna a ni tih lantirna certificate atan thisen pek hi i hmang ṭhin ang u," a ti.
Mizoram chu India rama HIV/AIDS hluarna ber state a nih thu sawiin Dr Jane Ralte chuan, "HIV sanna ber state kan ni a, a hmingchhiatthlak hle. He kan hmingchhiatna hi tireh turin nasa taka ṭan kan lak a ngai," a ti a; Mizoram chu HIV hluarna ber state ni mah se, Mizoramah thisen dawn aṭanga HIV kai record a la awm loh thu sawiin, thisen dawn aṭanga miin HIV an kai loh zel theih nan fimkhur turin thisen pe ṭhinte a chah.
GAC-a NVBDD puala inkhawmah hian GAC principal Lalbiakzuala, AVBD president C Lalnunnema leh general secretary Lalrinkima bakah, MSACS joint director Dr Lalnunhlima Khiangte te pawhin thu an sawi a; thisen pe ṭhin tur leh thisen pek lama hma la tura intiamna thu sawi rual a ni.
Inkhawm zawhah GAC zirlaite leh zirtirtute'n thisen pe nghalin, unit 184 an pe a, petute mipa 141 hmeichhia 43 an ni a; ZMCH tan unit 124 leh Civil Hospital, Aizawl tan unit 60 pek a ni.
NVBDD hi Lungleiah chuan Lunglei College-ah hman niin, zirlaite'n Civil Hospital, Lunglei tan thisen unit 40 an pe a, petute mipa 28 leh hmeichhia 12 an ni. Serchhipah pawh MSACS, Serchhip AVBD, Serchhip District Hospital leh Brilliant Higher Secondary School ten an hmang a, Brilliant HSS NSS-te'n thisen unit 14 an pe a ni.