KHAWTHLIR

Thlai chi sem

Agricultural Technology Management Agency (ATMA) leh Siaha District Agriculture Office chuan September 29, 2026 khan tél siamna tur thlai chi an sem. Leiṭha siam dan inzirtirna an buatsaih nghal a; assistant district agriculture officer John Lalnunsanga’n sorkarin leiṭha a pek chhuah dan a sawi a, KVK subject matter specialist Isaac Lallawmkima'n National Mission on Natural Farming chungchang a sawi bawk.

Ambulance hlan

Lawngtlai East bialtu MLA Dr Lorrain Lalpekliana Chinzah, adviser to CM chuan nimin khan a biala Lungtian MDC constituency-te'n an hman turin MLA fund hmanga a lei ambulance a hlan. Dr Lorrain Lalpekliana chuan, "Dam loh nikhua leh emergency-ah mi harsa leh chanhai zawkte'n an chhawr ṭangkai ngei ka beisei," a ti.

Nutrition inzirtir

Khawzawl ICDS chuan Poshan Maah (Nutrition Month) pualin nimin khan Khawzawl Vengthar YMA Hall-ah 'Anganwadi Management Committee & Nutrition' zirhona an buatsaih. Zirhonaah hian Khawzawla VC member hmeichhiate leh anganwadi worker-te telin, block coordinator Lalruatfela Sailo-in a kaihruai a; CDPO Esther Laltlinpuii, circle officer Lalrinsiama leh circle officer B Zoramthangi ten thil pawimawhte an zirtir a ni.

Upate Ni hmang

Mizoram Upa Pawl (MUP), Kanan Branch, Aizawl chuan nimin khan Kanan Veng Kohhran Hall-ah Upate Ni an hmang a, Lunglei High Powered Committee vice chairman V Malsawmtluanga, MLA-in a hmanpui.

ODMP siam zirho

Lunglei District Disaster Management Authority chuan September 30, Nilaini khan DC conference hall-ah Lunglei district-a sorkar pisa hotute pualin chhiatna a thlena chêt lâk dan tur ruahman lâwkna, Office Disaster Management Plan (ODMP) siam dan zirhona a buatsaih a; DDMA chairman Navneet Mann, bawrhsapin a hmanpui. Zirhonaa telte hi ODMP siam chhintir an ni a, ODMP an siamte sawiho nghal a ni.