Little Flower Convent School jubilee lawm

Little Flower Convent School (LFCS), Serchhip chuan nimin khan an kum 50-na, golden jubilee an lawm a, chief minister Lalduhoma'n a hmanpui.

Chief Minister chuan, zirna a ngaih pawimawh thu sawiin, zirtirtu eng emaw zat lak thar a nih bakah, hmun hrang hrangah zirna-inte tihchangtlun mek zel a nih thu a sawi a; zirna kaihhnawiha sorkar hmalakna hrang hrang sawiin, "Ṭhangthar awm zel turte tan hian zirna ṭha zawk neih kan tum a ni," a ti.

LFCS-in golden jubilee a thlen theihna tura inhmangte zawng zawng thawhrimna leh inpekna ropui a tih thu sawiin Lalduhoma chuan, "LFCS hi Serchhip chanchin nena inzawm tlat, khawtlang nun kaihruaitu leh chhertu pawimawh tak a ni," a ti a; hun lo kal zel turah pawh an thupui 'In Thy Light We Shall See Light' tih chu vawng nung a, eng mawi tak ni zel turin duhsakna a hlan.

Jubilee lawmnaah hian Serchhip bawrhsap Paul L Khuma, headmistress Wilma leh mi dangte'n thu an sawi bawk a; zirlaite'n zai, hnam lâm, rimawi tum leh hmuhnawm chi hrang hrang an entir a ni.

Little Flower Convent School hi February 2, 1976-ah din a ni a, Catholic Kohhranin kum 14 an enkawl hnuah kum 1990 khan Mizoram sorkarin thawktute chu deficit pay scale-in hlawh a tumsak a ni.