ZPM-in Sikpui Fehchhuah an nei

Zoram Peoples' Movement (ZPM) Southern Headquarters hruaitute chuan kar kal ta khan Sikpui Fehchhuah neiin, Ṭawipui tlangdunga khaw hrang hrang an fang a; an party hruaitute leh khaw­tlanga mi pawimawh tak takte nen an inkâwm.

Lungleia ZPM hruai­tute chuan November 8, Zirtawpni zan khan Ṭawipui North-I khuaah hun an hmang a; an trea­surer Lalrinpuii'n thu sawiin, "ZPM lungphùm chu Isua Krista a ni a, chuvang chuan, party dangte'n dâwt phuahchawp hmang­a nasa taka min beih ang hi keini chuan kan tih a rem ve lo a, dâwt hmanga Mizo mipui hnena an inzawrh anga kan inzawrh ve a rem hek lo. Kan rin chhan Pathian duh dana kan kal zel a pawimawh ber a ni," a ti.

Lalrinpuii chuan, Mizo-rama sorkarna siam tawhtu Congress leh MNF party-te'n Mizo mipui an bum kual reng tih sawiin, "In­thlan dawna an thutiam tihhlawhtlin an nei ngai lo tluk a ni. Chuvang chuan, kan ṭhenawm state-te pawhin tunah chuan changkânna leh intodelhna kawngah nasa takin min tlansan tawh," a ti a; Mizoram chu Kristian ram a nih avangin, ṭhenawma ring lo mite aia changkâng lo leh intodelh loa awm tur a nih loh thu a sawi.

Mizorama sorkarna siam tawh party-te'n Mizoram hmasawnna tak tak leh intodelhna tur zawnga ram an kaihhruai loh avang­in ZPM chu a piang tih sawiin Lalrinpuii chuan, "ZPM hi Mizo mipuite hian MNF sorkar thlaktu tura an ngaih leh beisei kan ni chho ta a ni," a ti a; in­thlan an hmachhawn vawi khatnaah opposition party zinga MLA ngah ber an ni thei nghal tih sawiin, Mizoram mipuite chu kal-phung thar, mipui sorkar a din ngei theih nan ṭawngṭai chunga theihtawp chhuah tur leh ZPM-a rinna nghat ngam turin a chah a ni.