Mizoramah Upate Ni lawm a ni

Social Welfare, Mission Foundation Movement leh MUP General Headquarters chuan nimin khan Chanmari YMA Hall-ah upate ni, International Day of Older Persons an hmang a; Social Welfare, Women & Child Development minister Lalrinpuii'n a hmanpui.

Lalrinpuii chuan, upate chu ram leh hnam ro hlu an nih avangin chawimawi an phu thu a sawi a; ṭhalaite chu upate ngaihlu tura chahin, "Upate'n hrisel taka an dam theih nan ei leh in bakah an ni tin nunphungte uluk taka an hman a pawimawh a, insawizawi uar a ṭha. Zûk leh hmuam leh ei leh in hrisel lo laka inthiar fihlim te, invawn ulukte a pawimawh," a ti a; an puala ni bik khawvelin a hmang ṭhin chu hlim taka hmang turin upate duhsakna a hlan.

Upate Ni pual hian kum 100 tling mi 11-te hnenah chawimawina leh lawmpuina hlan a ni a, intihsiakna hrang hranga lawmman sem a ni. Nilengin kum upa kal khawmte tan Directorate of AYUSH-in a thlawna inentirna an buatsaih bawk.

Minister of state Lalnghinglova Hmar pawhin nimin khan a biala Dawrpui Vengthar leh Tuikual South-ah Upate Ni a hmanpui. MoS chuan, "Thil tam tak kan hriat te, kan hnam kalphung leh kan hnamin thil ṭha tak tak kan neihte hi min zirtirtu chu upate an ni a, aia upa zah te, lengkhawm hla ṭha tak takte leh Mizo thil hlu tam tak hretute an ni. Tunlaiah changkanna kan vêlah tam tawh mah se, kan pi leh pute min zirtir aia thil hlu hi a la awm lo," a ti.

Upate Ni lawmna hi Dawrpui Vengthar Branch MUP chuan Dawrpui Vengthar Presbyterian Kohhran Hall-ah an hmang a; an member kum 90 chung lam mi 16 hnenah lawmpuina an hlan. Tuikual South MUP chuan Tuikual South Jubilee Rûnah an hmang a; kum 37-na champha an lawm bakah, Art & Culture department leh MUP Gen. Hqrs buatsaih lengkhawm zai intihsiaka an area bik pakhatna an nih an lawm nghal bawk.