Medicinal Plant Board silver jubilee lawm

Mizoram State Medicinal Plant Board (SMPB) chuan nimin khan Aijal Club-ah silver jubilee an lawm a, Health & Family Welfare minister Lalrinpuii, SMPB Mizoram Executive Body Chairman ni bawkin a hmanpuiin, 'Medicinal Plants of Mizoram' tih lehkhabu a tlangzarh.

HFW Minister chuan SMPB chu Mizorama ramhmul damdawi humhalhna kawngah te, ramhmul damdawi chìn leh enkawl zuiah leh zirchianna te hma latu ber a nih thu a sawi a, "Mizoram leilung hausakna hi kan economy chakna hnâr a ni," a ti.

SMPB-in Mizorama district palia sikul 52-ah Herbal Garden an siam tawh tih sawiin Lalrinpuii chuan, "Lungleng Khawthlir Tlangah Herbal Garden siamna tur ruahman mek a ni a, Mizoram mai bakah India rama chhuanawm ber pawl a nih theih ka beisei," a ti a; Curcuma zedoaria (aichhia), Emblica officinalis (sunhlu), leh Homalomena aromatica (anchiri) lamah pawh Mizoramin hma a sawn mek thu a sawi..

SMPB kum 25 tlin lawmnaah hian Health secretary Lalzarmawii'n inlawmna thu a sawi a, SMPB programme officer Dr T Lalliankimi'n SMPB hmalakna leh hnathawh te a sawifiah.

SMPB silver jubilee lawmnaah hian medicinal plant stall eng emaw zat siam a ni a, chawhnuah 'National Symposium on Medicinal Plants' buatsaih niin, mithiamte'n thupui hrang hrang an sawi a ni.