Larsap-in PUC Cultural Day a hmanpui

Pachhunga University College (PUC) chuan nimin khan an hmunah Cultural Day vawi ngana an hmang a, Larsap Gen. Dr Vijay Kumar Singh khuallian a ni a, Higher & Technical Education minister Dr Vanlalthlana leh minister of state F Rodingliana te khualzahawm niin, MZU vice chancellor Prof. Dibakar Chandra Deka chu khualṭha a ni.

PUC Cultural Day-ah hian Mizo hnam làm, zai leh hnam thuam chi hrang hrangte entir a ni a, RINI Speech AI duang chhuaktu, PUC aṭanga zir chhuak Zoramthanga hnenah Larsapin Laisuih Award a hlan. Tharum thawhnaa inhnamhnawih lo tura intiamna thu sawi rual a ni bawk.

Larsap chuan, Cultural Day chu mahni nihna hriat chianna leh chhuang taka lantirna hun a nih thu sawiin, "Hnam ziarâng leh nunphung hi hnam leh khawtlang min phuar khawm tlattu a ni a, ṭhangtharte'n an hriat thiam a, an ngaihhlut a, an chhawm nun chauhin a dai lo ang," a ti a; a ti. Mizo hnam ziarâng leh nunphung 'hate humhalh zel turin kal khawmte a chah.

India ramin tunlai thiamna leh thil thar thlen kawngah nasa takin hma a sawn tih sawiin Gen. VK Singh chuan, "Mahni hnam ṭobul hloh si loa hma lam pan hi hmasawnna awmze nei a ni a, khawvel thiamna leh remchanna chhawr ṭangkai chung zela mahni hnam ziarâng leh nunphung hluta vawnghim tlat hi kan tih tur a ni," a ti.

HTE minister Dr Vanlalthlana chuan, silhfen inbel hmang ringawta hnam ziarâng pho lan a tâwk lo tih a sawi a; ṭhalaite chu hnam incheina an hâk rualin an thinlungah aia upa zahna leh tlawmngaihna vawng nung reng tur leh, an awmna apiangah Mizo hnam ziarâng leh nunphung zahpui lo turin a fuih.

MoD F Rodingliana chuan, Mizo hnam ziarâng leh nunphung zinga mi chhiatni ṭhatnia inṭawiawm chu thlahthlam lo turin ṭhalaite a chah a, "Thiamna leh finna zawn rualin chhungkaw din pawh ngaih pawimawh tel a ṭul," a ti. Prof. Dibakar Chandra Deka pawhin thu a sawi bawk.

PUC Cultural Day pual hian college tualah stall eng emaw zat siam niin, September 28 khan principal Dr H Lalthanzara'n a hawng a, thil chi hrang hrang zawrh a ni.