Thuneituten Serchhip Jail an enfiah

Serchhip District Prison & Correctional Home (jail tih ṭhin) chu September 30, Nilaini khan Juvenile Justice Board (JJB) hotute'n an enfiah a; táng mi 94 an awm mek.

JJB inspection team hi principal magistrate Josangzeli hoin an thawk chhuak a, member dang Lalhmingsanga Ralte leh Jane Zodingliani bakah, Serchhip legal cum probation officer Saidingpuia Sailo, legal aid counsel Lalrinhlua an tel a, Serchhip Sub-Hqrs YMA president PC Vanlalluna leh Serchhip MJA president Kapliana Pachuau ten an ṭawiawm.

Inspection team hian jail thuneitute leh tángte kâwmin, an harsatnate an zawt a; jail-a duty tur doctor leh nurse an neih loh avangin harsatna hrang hrang an tawk ṭhin a, thuneitute hnena an thlen pawhin awmzia a awm theih loh thu an lo hrilh. Staff nurse thawk ṭhin chu August 5, 2025 khan Aizawlah sawn a ni a, a thlaktu dah a nih loh thu an sawi.

Serchhip District Prison & Correctional Home-ah hian mi 94 an táng mek a, mipa 87 leh hmeichhia pariat an ni. Táng zingah rûkrûk vanga táng tam berin, mi 43 an ni a; NDPS Act vanga táng mi 17, MLP Act vanga táng mi 16, kumtlinglo pawngsual vanga táng mi pakua leh chhan dang vanga táng mi pakua an awm bawk.

JJB inspection team hian jail-a awmte tan artui leh thlai chìn tur chi hrang hrang an kensak. September 30 vek khan Serchhip District Hospital aṭangin doctor pahnih leh thawktu dangte'n tlawhin, an hriselna dinhmun an enfiah a; nimin khan Serchhipa Family Guidance & Counselling Center-a thawkte'n counselling an neihpui bawk.