Larsapin officer training mekte a kâwm

Governor Gen. Dr Vijay Kumar Singh chuan nimin khan Lok Bhavan-ah Mizoram Civil Service (MCS), Mizoram Information Service (MIS) leh Mizoram Finance & Accounts Service (MFAS) officer training mek mi 34-te a kâwm.

Gen. Dr VK Singh chuan, officer tharte chu mipui rawngbawl an ni tih inhre reng tur leh harsatna sukiangtu nih tum turin a chah a, "Danglamna thlen thei dinhmuna in din hunah hmasawnna leh danglamna thlentu nih tum ang che u. Hna zirlai mek in ni a, nakin zela in buai loh nan training chhawr ṭangkai u la, tunlai thiamnate ngai pawimawhin inher rem zung zung thei turin inbuatsaih ang che u," a ti.

Rinawmna, inpekna leh taimakna vawng tlat tura chahin Larsap chuan, nakin lawka Mizoram sorkar innghahna leh hmachhuan turte an nih avangin tun aṭanga inthlahdah loa theihtawp chhuaha inzir turin a fuih bawk.

Officer 34-te hian Administrative Training Institute (ATI)-ah foundation training an nei mek a; Lok Bhavan-ah hian ATI director Rita Lalnunmawii Pachuau-in a ṭawiawm a, ATI-in training a kalpui dan tlangpui Larsap a hrilh a ni.