Electoral roll-a inthun dilna hun hawng

Aizawl deputy district election officer Zoramsiama Hmar, additional DC chuan nimin khan Aizawl DC Pisapui Hall-ah thuthar thehdarhtute a kâwm a; Election Commission of India (ECI)-in electoral roll-a inthun thar duh te, siamṭhat leh paih ngaite tan BLO-te hnenah dilna thehluh theih a nih thu a sawi.

Zoramsiama Hmar chuan, tunah hian ECI-in continous updating for electoral roll hun a hawng thar leh tih sawiin, "Roll-a inthun thar dilna (Form 6), siamṭhat (Form 7) leh paih ngaite paih (Form 8) theih a ni. Continous updation-ah hian vote nei thei tura kum tling thar te, electoral roll-a la lut lote chu an luh ngei theih nan BLO-te hnenah dilna thehluh theih a ni," a ti.

Tarlan danin, SIR 2026 final electoral roll chungchanga DEO hnena appeal thehluh hun hawn chhungin Aizawl district-a MLA bial 12 zinga bial 11 aṭangin appeal lut an awm a, Tuivawl bial aṭanga appeal lut a awm lo.

October 6-23, 2026 chhungin appeal lutte chu ngaihtuah (hearing) a ni dawn a; electoral roll continous updation leh appeal hearing neih turah hian thil insu buai awm lo tura ngaih a nih thu an sawi.

AIZAWL DISTRICT-A SIR 2026 APPEAL LUT ZAT

Aizawl North-I 17

Aizawl North-II 28

Aizawl North-III 134

Aizawl East-I 86

Aizawl East-II 272

Aizawl West-I 86

Aizawl West-II 104

Aizawl West-III 7

Aizawl South-I 31

Aizawl South-II 24

Aizawl South-III 1

Tuivawl 0

TOTAL 790