GMR-in Rs. 2,17,44,661 an chhûng lut

Geology & Mineral Re­sources (GMR) depart­ment chuan sorkar kum kal mekah kumin April aṭanga September thla thleng khan chhiah (royalty) leh fee hrang hrang aṭangin Rs. 2,17,44,661 an hmu a, sorkar sum báwmah an chhûng lut. DMR hnuaiah hian lung lâk phalna nei mi 361 an awm mek.

Sorkar thuchhuah tarlan danin, GMR de­part­­ment hian April-Sep­tember, 2019 chhung khan royalty leh sum an chawitir (fine) aṭangin Rs. 2,12,43,661 hmuin, sorkar Treasury-ah an chhûng lut a; chu'ngte chu - lung lakna aṭangin Rs. 1,49,08,245, balu lâkna aṭangin Rs. 63,32,392 leh leirawhchan siamna lei (tlak lei) aṭangin Rs. 3,024 a ni.

ONGC-I, ONGC-II, Oil India leh Vedanta Ltd.-te aṭangin petroleum exploration licence (PEL) Rs. 5,00,600 an hmu bawk a; chu'ngte nena thla ruk (April-September) chhunga an sum hmuh zawng zawng chu Rs. 2,17,44,661 a tling.

GMR department hian thla ruk chhung vêk khan lei min/tawlh hmun 53-ah an tlawh a, in sakna hmun (house site) hmun 80-ah an enfiah. Lung lâkna (quarry) thar tur hmun 23-ah leh quarry-a lung hâlna tur hmun pariatah an endik bawk.

Thla ruk chhungin lung lak phalna (mining permit) thar 98 an pe chhuak a, mining permit tharthawh (renew) zat chu 263 a ni a; lung lak phalna nei mek zat chu mi 361 an ni. GMR department hian check gate 23 an nei mek a, chu'ng zinga 10 chu check gate nghet niin, 13 erawh chu a ṭul anga sawn kual ṭhin a ni thung.