Assam NRC tihchhuah a nih hnuah Temporary ILP pek chhuah a tlahniam

Assam sorkarin National Registration of Citizen (NRC) an tihchhuah hnuah Kolasib district-a Inner Line Permit (ILP) pek chhuahna (ILP counter) pathumah temporary ILP pek chhuah nasa takin a tlahniam.

Kolasib district-a temporary IL pek chhuahna - Vairengte, Bairabi leh Phaisena mite chu November 9, Inrinni khan Mizoram Journalists' Association (MJA) Kolasib District member-te chuan an tlawh a, temporary ILP pek chhuah dan an zir chiang. Record-a a lan danin, Assam-ah NRC kalpui a nih hnuah khaw pathumahte hian temporary ILP pek chhuah nasa taka a tlakhniam thu leh ILP pek danah tihsual a awm loh nan an fimkhur hle thu, thawktute'n an lo hrilh.

Record-a a lan danin, Vairengteah hian August 2019 chhung khan temporary ILP 9,128 pek chhuah a ni a, September-ah 7,842 leh October-ah 6,850 pek chhuah a ni.

Bairabi-ah pawh thawktute chuan temporary ILP pek chhuah zat a tlakhniam thu sawiin, Assam-ah NRC kalpui a nih hma kha chuan thla tin ILP 2,500-3,000 vel an pe chhuak a, October thlaah erawh chuan 1,500 chiah an pe chhuak tih an sawi.

Bairabi-ah chuan Assam lam aṭanga rél chawlhhmun thlen hmaah ILP counter a awm a; ILP counter chu rél chawlhhmuna awm tur a nih laiin, tunlai hian an kalpui lo niin thawktute chuan an sawi a ni. ILP counter thawktute chuan, Assam aṭanga lutte chu Assam NRC-a an chuan leh chuan loh an enfiah a, NRC chuang lote chu an lettir zel tih an sawi. NRC-a an awm leh awm loh chu an ARN number aṭangin an en ṭhin. Assam ni lo, state dang mite chu a hmaa document neih ngaite hmangin an endik ṭhin bawk.

ILP counter-a thawkte sawi danin, an harsatna lian ber chu thawktu indaih lohna a ni. ILP counter-te chu eng lai pawha hawn a nih laiin, Vairengte-ah thawktu pathum chiah an awm a, Bairabi-ah thawktu mi pahnih chiah an awm. Phaisen counter erawh chu IR police duty-te'n an thawh nghal avangin duty apiang kutah a awm thung.

Vairengte bikah, ILP counter leh police checkgate inhnaih lutukin harsatna a siam tih Vairengte SDO(C) Isaac C Lalrempuia chuan a sawi a, "ILP lâk tuma nghak an tam ṭhin avangin traffic a tibuai a, ILP lak chhuah nghak loa a rûka tlang theihna remchang a tam phah. Police-te hi an fimkhur êm avangin ILP la loa kaltlang rù an tlem zawk a ni," a ti.

Vairengte SDO chuan, temporary ILP la an tam ngaihtuahin, district hrang hranga DC office aṭanga ILP pangngai la an tlem nia a lan thu sawiin, "Temporary chauh nei, a taka ILP la ta lo an awm em tih hi khauh zawka enfiah ni se, ILP hmang dik lo emaw, ILP nei lo emaw an tlem ang," a ti a; ILP aṭanga sorkara sum lut pawh a tam zawk a rinawm thu a sawi.

Temporary ILP pek chhuahna counter-ah hian ILP pakhatah hian Rs. 100 zel lak a ni a; Phaisena mi chu police-in an kenkawh avangin, ILP  aṭanga sum an hmuh chu Kolasib SP Office-ah an pe a, SP Office-in Kola­sib DC-ah an pe lut leh ṭhin.

ILP counter-a thawkte chuan, khualzin (tourist) chu an harsatna a nih thu sawiin, "ILP lak ngai zingah tourist ziah tel a nih loh avangin tourist tan a ngai lo an ti, tia sawi an awm ṭhin. NRC chu Supreme Court-ah an khin mek avangin tun atan a la rintlak loh tia ṭan khawhte an awm ṭhin bawk," an ti.