KHAWTHLIR

Damveng Branch KṬP chuan an kum 40-na, ruby jubilee pualin Inrinni khan an kohhran hall-ah blood donation camp an huaihawt a, Synod Hospital tan thisen unit 36 an pe a, petute mipa 30 leh hmeichhia paruk an ni.

Mizoram Public Service Commission (MPSC) chairman Rev. Zo­sangliana Colney chu November 8, 2019 khan pension-in a chhuak a, a thawhpuite'n an thlah. Rev. Zosangliana Colney hi November 10, 1957-ah a piang a, nimin thleng kha a thawh theih hun ni mah se, Pathianni a nih avang leh Inrinni a tlak avangin November 8 khan a chhuak a ni.

Baptist Church of Mizoram (BCM) Pastoral Committee November 6-7, 2019 chhunga Serkawna ṭhukhawm chuan, pastor atan mi panga an la thar a, nakkuma BCM Assembly-ah pawm a nih chuan nemngheh an ni ang. BCM pastor atana lakte chu - Joseph Liansangpuia, Lunglei Chanmari Vengthlang, K Lalrammawia Lunglei Salem Veng, Lalmuanpuia, Pangzawl Ramrikawn, Lalramliana, Dinthar (Aizawl West) leh RJ Lalnunpuia, Lawngtlai Bazar Vengte an ni. BCM Pastoral Committee meeting hian pastor posting & transfer chung­chang an ngaihtuah bawk.

November 8, 2019 aṭang khan Damparengpui, Mamit district-ah Home Mission North Bru Convention vawi 4-na neih a ni a, nizan khan a ṭiak. Convention thupui chu 'Ringtu nun' tih a ni a, speaker chu H Lalṭanpuia, Kraws Fate Team a ni. Inkhawmpuiah hian Pathian biak inkhawm neih ṭhin a nih bakah, cultural prog­ramme leh counselling class-te neih ṭhin a ni.

Governor PS Sreedharan Pillai lehkhabu ziah pahnihte chu November 9, Inrinni khan Sharjah International Book Fair(SIBF), Sharjah, United Arab of Emirates (UAE)-ah MP hlui AP Abdullakutty chuan a tlangzarh. Larsap lehkhabu ziahte hi 'Utharam Thedumbol' (Sap ṭawngin 'Searching for the Answer' tihna) tih leh, 'Anchadi Thottangal' tihte a ni a, heng lehkhabu pahnihte hma hian lehkhabu 101 a lo tichhuak tawh a ni.