India rama mau chìnna 14 % Mizoramah awma chhût a ni

Mizoram zau zawnga 32.07% chu mau awmna hmun a ni a, Mizoram mau awm zinga 95% chu Melocanna Baccifera (mautak) niin, India rama mau chìnna hmun zinga 14% chu Mizorama awm anga chhût a ni.

Directorate of Science and Technology hnuaia Mizoram Science, Technology & Innovation Council (MISTIC) leh Council of Scientific and Industrial Research Advanced Materials and Processes Research Institute (CSIR-AMPRI), Bhopal-te chuan November 8, 2019 khan Secretariat Conference Hall-ah mau chanchin leh hman ṭangkainate zirhona, 'Bamboo composite materials for structural applications' tih hmangin an huaihawt a, Mizo­ram Bamboo Development Board vice chairman Dr K Pa­chhunga, MLA-in a hmanpui.

Seminar-a tarlan danin, Mizoram zau zawnga 32.07% (square km. 6760.71) chu mau awmna hmun a ni a, Mamit district leh Lunglei district-ah mau a tam zual. India rama mau chìnna hmun zinga 14% chu Mizorama awm anga chhût a ni a, Mizoram mau awm zinga 95% chu Melocanna Baccifera (mau tak) a ni. Mautakte chu thil hrang hrang siam chhuah nana hman nasat a nih thu, CSIR-AMPRI mithiamte 

chuan an sawi.

Dr K Pachhunga chuan, Mizoram sorkar­in hna thawk turin kawng hrang hrangin hmalak a tum mek tih sawiin, "SEDP kalpui nan board hrang hrang din a ni a, chumi hnuaiah chuan Bamboo Development Board hmangin Mizorama maute ṭangkai zawka hman a nih theih nan hmalak a ni dawn," a ti.

Mizorama maute chu a hranpaa enkawl a ngaih loh thu sawiin K Pachhunga chuan, "Chief Minister pawhin ram hmasawnna atan hman ṭangkai a tum a, maua kan hausakna hi thiamna hmanga tlo zawk leh hlu zawk a kan sâwngbàwl thiam a ṭul," a ti a; Mizorama maute chu ram hmasawnna atan tunlai thiamna nen ṭangkawpin chhawr ṭangkai a ngaih thu a sawi.

Seminar hi principal scientific officer Dr Lalnuntluanga Colney-in a kaihruai a, MLA F Lalnunmawia pawhin thu a sawi. Senior principal scientist Dr SKS Rathore leh CSIR-AMPRI director Dr AK Srivastava ten mau hmanga in sakna hmanrua siam dan leh hlâwk zawka tihral theih dante an sawifiah.

Principal scientist Dr S Murali-in, 'Overview and prospects of major bamboo species in India for multipurpose application’ tih sawiin, chief scientist Dr SAR Hashmi-in, 'Bamboo composites: A new material of construction' tih a sawi a; MISTIC-a scientific officer Davy Lalruatliana'n ‘Bamboo resources in Mizoram’ tih thupui a sawi bawk.

Seminar-ah hian MIRSAC, BIOCONE, STAM, MIZOFED, Zonun Mat Ply, Mizoram University, IPR department, Environment, Forests & Climate Change department, Horticulture department, Mizo Academy of Sciences leh mau lam buaipuitu mi eng emaw zat an tel a ni.