Khaw hrang hrangah Ram Pum Huap Ruihhlo Do Kawngzawh huaihawt a ni

Nimin khan Mizoram hmun hrang hrangah 'Ram Pum Huap Ruihhlo Do Kawngzawh' huaihawt a ni a; thupui atan 'Ruihhlo tel lo hringnun' tih hman niin, kawngzawhna telte chuan ruihhlo ti lo turin thu an tiam.

Kawngzawh hi Mizoram Synod, Central YMA leh MHIP bultuma huaihawt a ni a, kohhran lamah Presbyterian Kohhran chauh ni loin, kohhran hrang hrang member-te an tel. Presbyterian Kohhran bikah chuan Junior department chin chung lam zirlaite leh zirtirtu te, puitlingte an tel a ni.

Aizawlah chuan hmun paruk - Vaivakawn, Electric Veng Sakawrpului, Pi Pangi Pêng (Venghlui, Republic Veng leh Upper Republic inrîna), Chanmari kâwn, Sikulpuikawn (Mission Veng) leh Khatla kâwn aṭangin kawng zawh ṭan a ni a, Lammualah an lut khawm. Aizawla kawngzawhah hian mi 8,000 vel an tela an ngaih thu CID hotute chuan an sawi.

Lammuala hun hman hi Synod moderator Rev. John Raldosanga'n kaihruaiin hunserh a hmang a; Social Welfare, Women and Child Development minister Lalrinpuii'n thu sawiin, ruihhloin Mizoram a luhchilh nasat thu leh theihtawp chhuaha do a ṭul thu a sawi.

Lalrinpuii chuan, ruihhlo ti chhin miah lo tura kalkhawmte sáwmin, "Chutianga in intiam a nih chuan ruihhlo ngawl in vei ve ngai dawn lo a, in dam chhung hun hlim leh nuam takin in hmang dawn a ni," a ti a; ruihhlo bâwiha táng lo turin kawngzawha telte a fuih.

Kawngzawha telte hian ruihhlo ṭhat lohzia tarlannate thuziak an keng a, ruihhlo ti lo tur leh ruihhlo tel loa nun hlimna neih theih a nih thutein an au rual. Central YMA president R Lalngheta kaihhruaiin ruihhlo ti lo turin thu an tiam bawk.

'Ruihhlo Do Kawngzawh' hi district khawpui hrang hrang leh khaw dang ṭhenkhatah te pawh huaihawt a ni a, mi ṭhahnem tak an tel a ni.