Minister hlui C Vulluaia vui a ni

Mizoram sorkara minister hlui leh prominent journalist C Vulluaia (90) h/o Remchhungi, Dawrpui Vengthar chu October 1, Ningani tlai dar 3:30 khan Ebenezer Medical Center-ah a thi a, nimin khan vui a ni.

C Vulluaia hi July 17, 1936-ah Tualcheng khuaah a piang a, fa pasarih leh tu ṭhahnem tak a nei. Kum 1973 khan Gauhati University aṭangin MA a zo a, kum 1975-ah LLB a zo leh a; Florida University leh Jerusalem University aṭangin doctorate degree hlan a ni bawk.

Sorkar hna hrang hrang a thawh hnuah C Vulluaia hi kum 1976 khan politics-ah lutin, PC Party a zawm a, MLA inthlanah ṭum ruk dingin, ṭum thum thlan tlin a ni. PC ticket-in kum 1978-ah Kawrthah bialah leh kum 1979-ah Sairang bialah thlan tlin a ni a; kum 1993 khan Khawzawl bialah thlan tlin leh niin, kum 1993-1998 chhung khan Congress ministry-ah minister a ni a, Law and Judicial, Trade and Commerce, Social Welfare leh Taxation department-te a enkawl.

C Vulluaia hian kum 1977 aṭangin Harhna chanchinbu tichhuakin, a thih thlengin editor leh publisher a ni a, kum 1980 aṭanga 1993 thleng khan Aizawl Weekly a tichhuak bawk. MJA chuan prominent journalist-ah a puang a, IPR department leh MJA ṭang dunin May 24, 2016 khan prominent press representative a puan mi panga zingah a tel.

YMA hruaitu hlun a ni a, YMA chhinchhiahna (emblem) duang chhuak­tu a ni. YMA Dawrpui Vengthar Branch-ah hun rei tak hruaitu a nih bakah, finance secretary (1969-1971), assistant secretary (1971-1973) leh general secretary (1973-1977) a ni.

C Vulluaia hi kohhran, ṭhalai leh zaipawlah nasa takin a inhmang bawk a; a thih hnua mit ṭha lote hman turin a mit a pe (donate) bawk.