KHAWTHLIR

Heroin man

Excise & Narcotics department leh Assam Rifles chuan nimin zing dar 8 khan Champhai Zote leh Bulfek inkar kawngah heroin kg 2.538 (hawng 200) an man a, a neitua puh mi pahnih - Khuplianmang (35) leh Thangbiakzau (18), Bulfek, Myanmar-a khawsa nia inchhálte an man nghal. NDPS Act, 1985 Section 21(c) tlawhchhanin thubuai ziah luh a ni.

Free tuition

Tlangnuam Vengthar Branch YMA chuan an Education Sub-Committee hmalaknain an veng chhung mi, kum 2027 HSLC Examination hmachhawn turte tan a thlawna zir bikna (tuition) an buatsaih a, October 1, Ningani zan khan Khuangchera Rûnah an hawng. Tlangnuam YMA hian kuminah zirlaibu hlui khawn leh sem, HSLC leh HSSLC pass-te lawmpuina hlan, career awareness, legal awareness, consumer awareness, sikul tlawh chhuahte an ti tawh a ni.

Kut hnathawktute Delhi-ah zintir

Hachhek bialtu MLA Robert Romawia Royte chuan a bial chhunga kut hnathawktu mi 50 tan a thlawna Delhi zin a buatsaih a, kut hnathawktute hian October 1, Ningani khan New Delhi an thleng a, ni ruk an chám dawn. Zinna atan hian Hachhek bialtu MLA chuan Agriculture Ministry-ah rawtna thlenin, Ministry-in Mizoram Horticulture department-ah a thawn chhawng. Sorkarin Rs 3,92,000 a tum a, MLA-in Rs 6,06,000 a tum bawk.

Lawmpuina hlân

MZP hruaitu lo ni tawhte chuan nimin khan Woodland Hills-ah MZP Intawhkhawmpui vawi 2-na an hmang a, thupui chu 'Mizo nationalism' tih a ni. MLA pali - K Sapdanga, Lalthansanga, B Lalchhanzova leh Lalmuanpuia Punte bakah, Lunglei Municipal Council-a councillor pahnih leh Sinlung Hills Council-a member pahnih hnenah lawmpuina an hlan.