Mizoram State University hmun atan P Lalnuntluanga, Serkawnin ram a pe

Mizoram State University (MzSU) ram atan P Lalnuntluanga, Ramzotlang, Serkawn te chhungkua chuan Lunglei Serkawna an ram bigha 12-a zau chu Mizoram sorkar hnenah an pe. Nimin khan Lunglei High Powered Committee (HPC) conference hall-ah ram neitu P Lalnuntluanga'n Lunglei HPC chairman Lalduhoma, chief minister hnenah ram neitu nihna lehkha a hlan.

Chief Minister chuan, MzSU din turah sorkar laipuiin inngaihtuah nan state sorkar chu kum 15 hun a pek thu a sawi a, "Kum eng emaw zat la awm laia a hmun tur tihfel a ni ta hi a lawmawm. Infrastructure hrang hrang - building, kalkawng, tui, êng leh tih tur hmabak tam tak a la awm a, zirtirtu lakte pawh hmabak a la ni," a ti.

MzSU din turah Mizoram sorkarin chhim lama political party, pawl, kohhran leh mipui duh dan hriain dodalna hrang hrang tâwn tlangin Lungleia dah turin thutlukna a siam thu sawiin Lalduhoma chuan, "Thutlukna siam hnuah pawh nawrna tam tak a awm chungin sorkar chu a dinna ngaiah a ding. MzSU hlawhtlin nan zavaia inṭawiawm a ṭul a, infrastructure lian tur a nih avangin tlo leh khuarei daih, a nihna ang tak ni turin a bulṭhut, a ban phun aṭangin dik taka a kal a ngai," a ti a; dik lo leh fuh lo a awm palh pawhin a tlai hmaa siamṭha thei tura inhrilh a pawimawh thu a sawi.

Chief Minister chuan, MzSU dinna atan ram pe thei mi tlawmngai tam tak an awm thu sawiin, "Ram ṭha leh remchang tak, bigha 12 laia zau petu Pu P Lalnuntluanga te chhungkaw chungah Mizoram sorkar leh HPC aiawhin lawmthu ka sawi," a ti a; ram inpek chungchanga inremnate ṭha taka kenkawh a, record fel tak neih a ṭul thu a sawi bawk.

Ram inhlanna inkhawm hi Lunglei HPC vice chairman V Malsawmtluanga, MLA-in a kaihruai a; Lunglei South bialtu MLA Lalramliana Papuia, Lunglei Municipal Council chairman Lalzuithanga leh councillor te, Lunglei bawrhsap Navneet Mann leh SP Shivam Siddharth te leh mi pawimawh dangte an tel a ni.