Minister 3 hoin IIS officer 2 thlah liam

October 1, Ningani tlaia Sateek daia lirthei chesuala thi Indian Information Service (IIS) officer pahnih - PIB leh CBC additional director general Dr Engam Pame leh Doordarshan Aizawl director (News) Nampibou Marinmai te chu nimin khan minister pathum - K Sapdanga, Dr Vanlalthlana leh B Lalchhanzova te hoin Tuikhuahtlang YMA Hall-ah thlah liam an ni.

Dr Engam Pame leh Nampibou Marinmai te hi Ningani zan khan ZMCH mitthi dahnaah dah an ni a, nimin chawhma dar 10 khan an taksa endik (PME) a ni. Nampibou-a chenna, Tuikhuahtlanga AIR quarters-a luhpui a nih hnuah Tuikhuahtlang YMA Hall-ah thlahna inkhawm neih a ni a; minister pahnih bakah, Tuikhuahtlang mi te, media lama thawk te, Nampibou-a lawina English Congregation member te, Aizawla Naga awmte an tel.

Minister K Sapdanga chuan, vanduaina tâwk chhungte a tawrhpui tak zet thu sawiin, "Media khawvelah chònna nasa tak a ni," a ti a; puih an ngaihnaah Mizoram sorkar chu a inhawng reng thu a sawi.

Education minister Dr Vanlalthlana chuan, Dr Engam Pame leh Nampibou Marinmai te chu media lama mi ropui leh entawn tlak an nih thu sawiin, a ui tak zet thu leh a chhungte a tawrhpui thu a sawi a; IPR minister B Lalchhanzova pawhin, IIS officer pahnihte chu sorkarin a ui tak zet thu sawiin, "Dr Engam Pame leh Pu Nampibou chhungte ka tawrhpui tak zet a ti," a ti.

Lok Sabha MP hlui leh Doordarshan director general hlui C Lalrosanga te, DDK leh AIR aiawh te, pawl hrang hrang aiawhte leh mitthi chhungte aiawhte'n thu an sawi a; English Congregation Church pastor Rev. Dr VL Kroschhuanmawia'n thlamuanna thuchah a sawi.

Dr Engam Pame leh Nampibou Marinmai te hi Naga niin, Manipur-a khawtlang lam Assam rîa awm Tamenglong district mi ve ve an ni a, nimin tlai khan BSF helicopter hmangin Manipur phurh thlen an ni.