Swachhata Hi Seva campaign khâr a ni

Nimin khan district ṭhenkhatah faina beihpui thlakna, Swachhata Hi Seva Campaign khâr a ni a; faina puala intihsiakna hrang hranga ti ṭhate hnenah lawmman hlan a ni.

Khawzawlah chuan bawrhsap K Vanlalṭhiana hoin DC conference hall-ah Swachhata Hi Seva khârna leh Swachh Bharat Diwas hman a ni a; village council tinah Solid Waste Management Rule 2026 hnuaia bawlhhlawh chi lia thliar leh ruahtui chhêk khawl lam inzirtirna Special Gram Sabha hun hman a ni bawk.

Swachhata Hi Seva chhungin Khawzawlah fainaa inelna huaihawt a ni a; Khawzawla veng fai berah Kawnzar Veng thlan a ni. Sikulah Elementary & Middle Section-a sikul fai ber chu Lungvar P/S-V a ni a, Higher Secondary Section-ah Khawzawl HSS a fai ber. Sorkar pisa fai berah PHE WATSAN Division pisa leh restaurant fai berah Alpha Hotel thlan a ni.

Thingtlang (rural) lama visual cleanliness (hmuh theiha fai) leh Swachhata Hi Seva hnuaia hma la ṭha ber chu Vankal khua a ni a, Arro leh Ngaizawl khuate'n an dawt.

Hnahthialah chuan Swachhata Hi Seva khârna pualin Swachhata Run huaihawt a ni a; Hnahthial chief medical officer Dr Lalnunziri'n intlansiakna telte vailiamin, intlan-siakna leh Waste to Art Competition-a tiṭhate hnenah lawmman sem a ni.

Swachhata Run-ah hian mi 54 telin, km 7 vela thui an tlan a; pakhatnain Rs 3,000, pahnihnain Rs 2,000 leh pathumnain Rs 1,000 an dawng. Mipaah F Malsawmzuala, Penial Veng leh hmeichhiaah Vansangkimi, Chanmari te pakhatna an ni a; nau-pangah Lalpekkima, Chan-mari pakhatna a ni bawk.

Waste to Art Competition-ah pakhatna Zosangliani hnenah Rs 5,000, pahnihna FD HSS hnenah Rs 3,000 leh pathumna Joel Lalkhawngaiha & V Lalnunsangate hnenah Rs 2,000 ve ve hlan a ni.