Sorkar engineer-te'n inkhawmpui an hmang

Mizoram Engineering Service Association (MESA) chuan October 1, Ningani khan Irrigation & Water Resources Department Auditorium-ah Annual General Conference vawi 45-na an hmang a; Public Works Department minister Vanlalhlana'n hmanpuiin, mipui tana thawk an ni tih hre reng turin engineer-te a chah.

PWD Minister chuan, MES officer (engineer)-te chu kawlphetha, tui, kawng leh in sakah mi pawimawh bik an nih thu sawiin, an hnain mipui náwlpui mamawh a huam kim em avangin mipui, khawtlang leh ram tan an hlut thu a sawi.

Engineer-te chu mipui tana thawk an ni tih hre reng tura chahin Vanlalhlana chuan, "Mizoram changkanna leh hmasawnna tam tak hi an hnathawh rah a ni a, an fakawm hle," a ti a; engineer an nih angin an hnathawhnaah thil thar ngaihtuah chhuah leh siam chhuah tum zel turin a fuih bawk.

MESA inkhawmpui hi an president Lalrinzuala Ralte-in a kaihruai a, MESA general secretary PC David Lalrinliana'n an pawl chanchin leh an hmalaknate a sawi. An member pension-te thlahna hun an hman bakah, member thite sûnna hun an hmang a, ro an rel bawk.

MESA hi kum 1972 khan din niin, an thupui chu 'Service to the People' tih a ni a, member 362 an awm mek. Member-te chu PWD, Public Health Engineering department, Power & Electricity department leh Irrigation & Water Resources department-a mite an ni.