Saiha College zirtirtu sawnna thupek sût an phût
Saiha College Students' Union hruaitute tun hnaia ṭhukhawm chuan, October 31, 2019-a Higher & Technical Education (HTE) department notification-in Siaha College-a assistant professor pahnih, thlaktu dah loa hmun danga sawn chhuah a ni chu pawi an tih thu an tarlang a; sorkarin thu a sût loh chuan semester exam kal lai chhunzawm loh an tum.
Saiha College SU chuan, an college-ah zirtirtu indaih lohna a nasat em em laia, zirtirtu pahnih sawn chhuah an ni chu an hrethiam lo hle tih sawiin, "Mara Autonomous District Council huam chhungah college pakhat chauh a awm a, mi harsa tak tak, hmun danga kal thei lote kal khawmna a ni. Chutih laia Mizoram sorkarin heti maia a enkawl hi mak kan ti hle a, Mara ram leh zirlaite hmuhsitnaah kan ngai," an ti.
Saiha College SU tarlan danin, Saiha College hi arts subject zirna a ni a, department pasarih a awm. Department pasariha zirtirtu awm dan chu - English-ah zirtirtu pathum, Mizo-ah pahnih, Political Science-ah pali, Sociology-ah pathum, History-ah pahnih, Economics-ah pahnih leh Education-ah pathum a ni.
Zirtirtu indaih lohna a nasat em em laiin Education department leh Political Science department-a zirtirtu pakhat ve ve chu hmun danga sawn chhuahna tur order October 31, 2019-ah chhuah a ni tih sawiin Siaha College SU chuan, "Pawi kan ti a, kan hrethiam lo hle. Heng mite hi engti kawng zawng mahin hmun danga sawn kan remti lo," an ti.
Saiha College SU chuan, zirtirtu sawn chungchangah HTE minister Dr R Lalthangliana hmuh tumin Aizawlah chawlhkar khat an chám chhungin an hmu thei lo tih sawiin, "Heti khawpa zirlaite ngai pawimawh lo Minister hi kan dem hle a, a rilru natthlak hle a ni," an ti a; HTE Minister chu hmu thei lo mah se, lehkha erawh a pisaah November 6, 2019 khan an dah thu an sawi.
November 6-a lehkha an dah tawh laiin, tun thlenga chhanna an la dawng lo chu hriatthiam har an tih thu an sawi a, "A rang thei ang bera transfer order sût turin Mizoram sorkar kan ngen tak meuh a ni. Zirtirtu transfer-te hi ṭhahnemngai ber berte zinga mi an ni a, zirlaite chuan engtikah mah Saiha College an chhuahsan kan phal dawn lo," an ti.
Saiha College SU hian an zirtirtu pahnihte sawnna tur thupek sût an phutnaah hian November 12, Thawhlehni chhun dar 12 thleng sorkar ngaihchan a, chumi chhunga thu lawmawm an hriat loh chuan college exam mek chu chhunzawm tawh loh an tum a ni.