Adviser to CM-in ANC Week a khârpui

Aizawl North College (ANC) chuan October 1, Ningani khan Vanapa Hall-ah Annual College Week vawi 37-na khârna inkhawm an hmang a, adviser to chief minister TBC Lalvenchhunga, MLA-in a hmanpui.

TBC Lalvenchhunga chuan, zirlaite chu khawvel hmachhawn ngam tura inbuatsaih lâwk tur te, classroom-a an zir chauh duhtâwk lo a, mahnia inhâi kuak dan zawng tel turin a chah a, "Mizote hi thil chi hrang hrang thiam, talent nei ṭha, thiam bik erawh nei lo kan nihna aṭangin hma kan sawn a ngai a, eizawnna tlak kan tuina zawn chhuah a, chu chu kan bawh chat a ṭul," a ti.

Zirlaite chu kum 10 hnua an dinhmun tur ngaihtuah chunga an tun hun ṭha taka hmang tura chahin TBC Lalvenchhunga chuan, "Hlawhtlinna kan chan hunah mahni tan chauh ni lo, khawtlang tana mi ṭangkai leh Mizoram tana hmasawnna thlentu kan ni tur a ni," a ti a; Mizoram leh a dinhmunte uluk taka zir turin a chah bawk.

Inkhawmah hian ANC principal Dr Saroj Laldinpuii'n an college dinhmun tlangpui a tarlang a; department pasarih neiin, zirlai 965 leh zirtirtu 55 an awm mek thu leh, kum 2024 khan NAAC accredited B-grade an nih thu a sawi.