MPCC-in RTI Act palzût tumah CM an puh

Mizoram Pradesh Congress Committee (MPCC) Communication department chuan November 9, Inrinni khan thuchhuah siamin, RTI Act hmanga minister-te'n lehkha an ziahte pek chhuah chu dan kalh leh hrem theih anga chief minister Zoramthanga'n tun hnaia a sawi chu RTI Act palzût tumnaa an ngaih thu an tarlang.

MPCC Communication chuan, "Tunhnai mai khan social media lamah chief minister Pu Zoramthanga'n PWD officer-te a koh khawmnaah, tun hnaia RTI dan hmanga minister-te lehkha, zirtirtu la tura an duhsak zawng la (appoint) tura an ziahna (official correspondence) thehdarh chu dan kalh, hrem theih tia a sawi thu a lang a, hei hi langtlang sorkar kan neih theihna tura India ram dan RTI Act palzût tumna a ni," an ti.

CM Zoramthanga thil sawi dan chu mak an tih thu sawiin MPCC chuan, Delhi lama BJP sorkar kalphung ang zela kal tumah MNF sorkar an puh a, "A lungchhiatthlak hle a ni," an ti a; MNF sang­awi zawnpui Narendra Modi kaihhruai sorkarin an duh thála an chêtna dâl thei tura an ngaih vanga RTI dan an siam rem anga che-ah MNF sorkar an puh a ni.

Congress party chuan, RTI Act chu India rama democracy nihna vawngtu, mipuite tana dan ṭha tàwpkhâwk a ni a, Official Secrets Act ai pawha dah chungnun a nih thu sawiin, "Ram danin kan chanvo tura min pek dan páwn lam hrem theih anga Pu Zoramthanga'n a sawi hi pawi kan ti a, kan sorkar officer-te hetianga a vau ta mai hi an chêt tawh dan zawh chhuah belh hlau a ang kan ti hle," an ti.

India ram danpui leh RTI Act hre chiang tâwk loah CM Zoramthanga chu puhin MPCC Communication chuan, "Mi­nister-te official corres­pondence zawng zawng pawh zawh chhuah theih a ni tih lo hre thar se kan duh," an ti a; BJP MLA Dr BD Chakma-a'n, 'He lamah chuan an do (BJP) a, khu lamah chuan an ṭan tlat' tia a sawi chu a dik hle niin an tarlang.

Congress party chuan, Chief Minister chu 'Buichhia laih loa inpuang' ang a nih thu an sawi a, "RTI Act hmanga kalphung dik lo hâi chhuah zel hi MNF kaihhruai sorkar hian a hlau tih a chiang hle a ni," an ti.