Sorkara dan loa pension la ṭhin mi 674-in sorkarah PPO an pe lêt

Dan loa family pension late tana mahni thua Pension Payment Order (PPO) pek lêt (surrender) hun Mizoram sorkarin a hawn chu September 30, 2026 khan a tawp a; hun hawn chhungin pension document-te sorkara pe let mi 674 an awm.

Vanglaini palai zawhna chhangin Accounts & Treasuries hotute chuan, Voluntary Surrender of PPO hi July 1, 2026 khan hawn a ni a, September 30 thleng kalpui a nih thu an sawi a, "Hun hawn chhungin mi 674-in pension an lakna PPO an surrender a, chung zinga 563 chuan pension an lakna Treasury office-ah an surrender a, direct-a bank aṭanga pension la mi 111-in an rawn surrender bawk," an ti.

Mizorama Treasury office 14-ah PPO surrender an awm vek a, PPO surrender hi Aizawl South Treasury-ah mi 269 awmin an tam ber a, Chawngte Treasury office-ah mi pangain pe letin, a tlem berna treasury a ni.

Hun tiam chhunga PPO sorkara pe lette hi sorkar chuan hrem a tum lo a; hun tiam chhunga family pension lehkha pawimawhte pe let lo te, dan loa pension la chhunzawm hmuh chhuah an awm chuan dan angin hrem tum a ni thung.

Accounts & Treasuries hotute chuan, dan loa pension la chhunzawmte thunei tute hnena report-na tur an ruahman thu an sawi a, "Directorate of Local Fund Audit & Pension (DLFAP), Accounts & Treasuries, Chanmari, Aizawlah leh Office of the Joint Director, Accounts & Treasuries, Southern Zone, Lunglei bakah Treasury office tinah confidential report box siam a ni," an ti.

Dan loa family pension la hriate chu sorkar hnathawk hming leh family pension la mektu hming, veng, khua leh contact number ziakin confidential report box-ah thlak turin Accounts & Treasuries hotute chuan mipui an chah a; phone number 8974421301-ah whatsapp/SMS hmangin report theih a nih thu an sawi bawk.