KHAWTHLIR

Pawl 4-in thisen pe

October 3, Inrinni khan pawl palite'n thisen unit 205 an pe. Ramhlun North Branch YMA chuan Civil Hospital, Aizawl tan unit 61 pein, petute mipa 44 leh hmeichhia 17 an ni a; September 26, 2026 khan an pe tawh bawk. KṬP, Bethlehem Vengthlang Branch-in Synod Hospital tan unit 54 pein, petute mipa 42 leh hmeichhia 12 an ni a; KṬP, Luangmual Pastor Bialin ZMCH tan unit 53 pein, petute mipa 39 leh hmeichhia 14 an ni. PYD (NEI) Pangzawl Section-a mipa 34 leh hmeichhia pathum ten Lunglei Civil Hospital tan unit 37 an pe bawk.

Upate Ni hmang

Lunglei District Social Welfare office leh Mizo Upa Pawl (MUP) Headquarters Lunglei huaihawtin October 1, 2026 khan Lunglei Convention Centre-ah Upate Ni (International Day of Older Persons) hman a ni a, Lungleia Social Welfare officer CL Joseph-a'n a hmanpui. MUP member-te'n zai, lâm, rimawi tum leh thil dang chi hrang hrang an entir a, infiamna leh intihsiakna hun hman a ni bawk.

Lirthei 3 hlan

Adviser to chief minister Dr Lorrain Lalpekliana Chinzah, Lawngtlai East bialtu MLA chuan October 2, 2026 khan LADC sorkara Sanitation department hnenah bawlhhlawh khawnna leh paihna tur lirthei pahnih - TATA 610 SK leh Bolero Camper (4x4) a hlân a, Lawngtlai District Hospital hnenah Bolero Camper (4x4) a hlan bawk. Lirtheite hi District Catalytic Intervention Plan aṭanga lei a ni a, hlanna hi LADC pisa tualah hman a ni.

Mipui dàwr theih turin minister ṭhu

Minister of state B Lalchhanzova chuan October 3, Inrinni khan a bial Aizawl East-II chhunga Chite Vengah mipui dàwr theih turin a ṭhu (public interview) a, pawlte leh mimal eng emaw zatin an duh leh mamawhte an thlen. B Lalchhanzova hian Chhinga Veng Presbyterian biak-in panna kawng chei that ngai laite a enfiah bawk a ni.