RTI Act Week Observance hmang

Siaha DC leh IPR department pisate chuan nimin khan DC conference hall-ah Right to Information (RTI) Act Week Observance an hmang a, bawrhsap Saizikpuii'n a hmanpui. Bawrhsap chuan, RTI Act chu sorkar khalh ngiltu leh official-te kalsual tur vengtu a nih thu sawiin, hmang thiam turin mipui a chah.

Saizikpuii chuan, RTI Act chu mipuiin sorkar aṭanga hriat an duhte dan ang taka an hriat theihna a nih bakah, sorkar hnathawkte fimkhur phahna tur a nih thu a sawi a, "Department tinte'n sorkar file kan vawn felfai a ngai a, langtlang taka thil kalpui a pawimawh. RTI hi mipuite'n ṭangkai leh ṭha taka an hman a ngai a, hman sual erawh a pawi. Sorkar khalh ngiltu, official-te kalsual tur laka vengtu a nihna anga hman thiam a pawimawh," a ti.

Inkhawmah hian Siahaa head of office leh pawl aiawhte an tel a; RTI Act leh Mizoram RTI Rules bakah, SPIO, SAPIO leh mipui hriat tur pawimawh zualte inhrilhfiah a ni. RTI Observance Week hi kum tin October 5-12 chhung hman ṭhin a ni.