KHAWTHLIR

PUC-in thisen pe

Pachhunga University College NSS chuan nimin khan an hmunah thisen pek rûnpui an huaihawt a, Civil Hospital, Aizawl tan thisen unit 209 an pe a, petute mipa 169 leh hmeichhia 40 an ni.

Hriselna enfiah

Serchhip District Legal Services Authority chuan Upate Ni (October 1) pualin nimin khan New Serchhipa upate enkawlna (old aged home) - Beiseina Ina awm mekte hriselna dinhmun an enfiah. Beiseina Inah hian mi pariat an awm mek a, Mizoram páwn lam mi pawh an tel. An zinga upa ber chu kum 91 a ni a, Cachar lam mi a ni. Nimina health checkup-ah hian Mercy Hospital aṭangin Dr Lalruatsanga leh a thawhpuite'n an endik a ni.

Innovation Yatra

National Innovation Foundation chuan October 3, 2026 khan Champhai bul Chhungte khuaah Innovation Yatra an huaihawt. Yatra hi Chhungte VC president C Ralthanga'n a kaihruai a, NIF Guwahati Cell hotute'n an hmanpui. Khawl chi hrang hrang siama hma latu Zoramchhana, Chhungte-in ‘automatic water pump machine controller’ leh thingpui hnah/fe sawngbawlna khawl a siamte a sawifiah. C Laltlanliana, Mualkawi-in ramhmul damdawi leh a hmanna a sawifiah bawk.

MP lawmpuina hlan

Hrangbana College-a Department of Commerce chuan nimin khan High School Field-ah Sports 2026 an hmang a, a hawnna inkhawmah HBC Alumni Association chuan Lok Sabha MP Richard Vanlalhmangaiha hnenah MP a nih avanga lawmpuina an hlan. Richard Vanlalhmangaiha hi HBC-ah kum 1994-99 chhung Commerce a zir a ni.

Ṭanpuina dil theih

Lawngtlai bawrhsap Donny Lalruatsanga chuan thuchhuah siamin, Dr Ambedkar Foundation kaltlanga schedule tribe leh schedule caste damlo khawsak harsa zual, natna khirh tuarte tan Dr Ambedkar Medical Aid Scheme (Revised 2026) chu www.dosje.gov.in ah dil theih a nih thu a tarlang. Ṭanpuina hi Rs 1,50,000 - 3,50,000 inkar pek theih a ni.