Serchhipa KPP inkhawmpui lian atan sum leh paiah sorkar tihbuai an tum lo

October 16-18, 2026 chhunga Serchhip Leisekawt Field-a neih tur 'Rampum Huap Kohhran Pavalai Pawl Intawhkhawm' buaipuitu Organising Committee chuan an hmalak dan, ruahmanna leh an thlen chin te nimin zing khan Serchhip Bethel Kohhran meeting hall-ah Serchhipa MJA member-te an hrilhfiah a; sum leh paiah sorkar an tihbuai loh thu an sawi.

Organising Committee chairman Upa Vanlalchhunga chuan, KPP inkhawmpui lian an thlen turah Mizoram sorkar sum hnîk buai loa thlen an tum thu a sawi a; chutihrualin, KPP intawhkhawm tur pualin sorkarin kawng hrang hrangin hmalakna a nei tih sawiin, lawmawm an ti a, sorkar hmalakna leh hnathawhah an inrawlh loh thu a sawi a ni.

Upa Vanlalchhunga tarlan danin, Rampum Huap KPP Intawhkhawm vawi 7-na thlenna atan budget siamin, Rs 50,10,000 ruahman a ni. Rs 30,00,000 chu Synod Revival Committee aṭangin an dawng a, a bâk Rs 20,10,000 chu chu Serchhip Pastor Bial, Vengchung Pastor Bial leh New Serchhip Pastor Bial ten Rs 6,70,000 ṭheuhin an thawh khawm. Mimal, kohhran leh pawl hrang hrang aṭangin ṭanpuina an dawng bawk.

KPP Intawhkhawm neihna atan hian Leisekawt Field-ah Mark Event & Entertainment-in pandal, a dung ft 200 leh a vâng ft 190-a zauin an sa mek. Pansal sakna atan bik Rs 30,00,000 ruahman a ni a, a chhung leh páwn lamah chhuatphah (carpet) phah vek tum a ni.

Organising Committee hruaitute chuan, KPP Intawhkhawm vuakvetah faina an ngai pawimawh a, mahni in leh a velte fai taka vawng tur leh vantlang hmunhmate tifaitu nih tum ṭheuh turin Serchhip mipui an ngen tih an sawi. Taxi, auto rickshaw leh bazara chawhmeh zuarte chu a man (rate) pangngai aia tito lo turin an ngen tih an sawi bawk.