Aizawl West Bypass Road-ah October 2026 ral hmaa zángnadawmna pe turin an phût

Aizawl Western Bypass Road sial mekah kawngpuiin a paltlang ram neitu zinga zangnadawmna la dawng lote chuan October 2026 ral hmaa zangnadawmna pe turin Mizoram sorkar an ngen; an ngennain awmzia a neih loh chuan November 1, 2026 aṭangin kawng laih chhunzawm a nih loh nan hma an lak dawn thu an puang.

Aizawl Western Bypass Road (AWBR)-in a paltlang tura ram neitute intelkhawmna, Sihhmui to Muallungthu Land Owners Welfare Association (SNLOWA) hruaitute chuan nimin khan Aizawl Press Club-ah thuthar thehdarhtute an kâwm a; zangnadawmna an la dawn loh dan leh hmalak an tum dante an sawifiah.

SNLOWA president Zion Lalremruata chuan, tun hnaia RTI Act hmanga ZONET TV zawhna PWD-in an chhan danin, AWBR-a zangnadawmna la pek loh chu mi 17 an ni a, zangnadawmna la pek tur zat chu cheng nuai 98.3 a nih thuin an chhang tih a sawi a, "Kan hriat danin, zangnadawmna la dawng lo hi mi 100 chuang kan la awm a, zangnadawmna kan dawn tur hi a vaiin cheng vbc 7.4 a la awm," a ti.

Zion Lalremruata chuan, zangnadawmna la dawng ve lote chungchanga PWD-in 'an dawng ve hman lo' tia RTI zawhna a chháng chu mak an tih thu a sawi a, "A hmaa pawisa an pek tawh pawh ram neitute nawr chhuah vang a nih laia ram neitute'n pawisa an dawng hman lo anga an chháng hi kan hrethiam lo," a ti a; ram neitute chuan engtiklai pawhin zangnadawmna an dawng theih reng thu a sawi.

An phûtte sawiin ram neitute chuan, "Compensate aia LSC thlangte ram hi tehsak ni tawh se kan duh a, quarry neitute hi department-a statement an rawn siam angin pawmsaka pek ni rawh se. Leivûng hi dumping ground-ah chauh paih ni tawh se kan duh a, kawng laih vanga lemin/leivungin a tihchhiat huan thlai neitute hnenah an phû tâwk zangnadawmna pek ni rawh se," an ti.

SNLOWA hruaitute chuan, zangnadawmna dawng turte chu an dawn hmain dawng turte târ chhuah ni tawh se an dh thu sawiin, "A hmasaa zangnadawmna pek a nih khan hming târ chhuah a awm lo a, a dawng turte kan awm kim em tih hriat ve kan duh," an ti. October 2026 ral hmaa zangnadawmna pe vek tura an ngennain awmzia a neih loh chuan November 1, 2026 aṭangin kawng laih chhunzawm a nih loh nan hmalak an tum thu an sawi a ni.

Zawhna chhangin ram neitute chuan, zangnadawmna kaihhnawiha PWD-in hma an lak dan chu mipui hriata puanzar phal loh, confidential-a an kalpui avangin zangnadawmna dawng tawhte pawisa dawn zat leh a dawngtute an hriat theih loh thu an sawi.

Aizawl Western Bypass Road sial mek hi PM-DevINE hnuaia project a ni a, Mizoram PWD-in an buaipui a ni.