Minister-in Champhaiah Project Greenshield a hawng

Horticulture minister C Lalsawi-vunga chuan nimin khan Champhai Circuit House conference hall-ah Project Greenshield a hawng. Project hi MGNREGA, MIDH leh RKVY PDMC scheme-te hnuaia Champhai district-a kumtluana tomato ṭha leh tam zawk thar a nih theihna tura hmalakna a ni.

C Lalsawivunga chuan, Bána Kaih hnuaia péng pangana ‘Decentralised Plan’ hnuaia kalpui mek Mizoram District Transformation Programme kaltlangin ‘Project Greenshield’ hawn a nih thu a sawi a, "Mizoram sorkar chuan district tinte'n an district-a an ngaih pawimawh emaw, an hnufualna emaw phuhru tura hma an lak theih nan Mizoram District Transformation Programme kaltlangin cheng nuai 100 ṭheuh a dah a, hmalakna a ṭhat dan azirin hei aia tam pawh la pek zel tura ruahman a ni," a ti.

Sorkar department-te'n mawh-phurhna hrang ṭheuh nei mah se, mipui rawngbawltu vek an nih thu sawiin Minister chuan, "Tum thuhmun nei kan ni tih inhre thar ila, thawhhona leh inpumkhatna ṭha nen theihtawp chhuah ho zel ang u. Hlawhtling tur chuan taimakna leh tumruhna nun chhuahpui a pawimawh," a ti a, hlawk taka Project Greenshield hmang turin loneitute a fuih.

Project Greenshield atan hian loneitu 10 thlan an ni a, greenhouse pakhat ṭheuh an enkawl dawn. Project-ah hian greenhouse 10, community water tank pakhat leh individual water tank 10 bun a ni a, green-house tinah drip irrigation dah vek a ni.