Horti. Minister-in Hnahsin Kût a hawng

Horticulture minister C Lalsawivunga chuan nimin khan Champhai Zotlang Mualah 'Hnahsin Kût 2026' a hawng. Nikuma Hnahsin Kût vanga Champhai leh a chhehvela sum che vel chu nuai 2,000 vel nia chhût a nih thu tarlan a ni.

C Lalsawivunga chuan, Mizoram mawina, hnam ziarâng leh ro hlute chu eco-cultural tourism hmanga pho lan leh khualzite hîp chu Hnahsin Kûtin a tum ber pakhat a nih thu sawiin, Kût hmang tura Mizoram chhung mai bakah, state dang leh ram dang aṭanga khualzin an kal chu lawmawm a tih thu a sawi.

Hnahsin Kût hlawhtling taka hman a nih theih nan Mizo Ginger Mission sum aṭangin Horticulture department chuan cheng nuai 20 a thawh thu sawiin Minister chuan, "Kût chhung hian Mizo Ginger Day hman a ni dawn," a ti a; khualzinte chungah ṭhat chhuah zel tur leh Zo nun ze mawi lantir zel turin mipui a chah.

Horticulture Minister chuan, kumin chhungin Champhai Winery-in grape wine litre 75,000 a siam tawh thu leh Rs 6,54,00,000 an hmuh tawh thu a sawi a; Hnahlan Winery-in grape wine litre 80,000 siam chhuak tawhin, Rs 3,00,00,000 an lak luh tawh thu a sawi bawk.

Sorkar thuchhuah tarlan danin, Hnahsin Kût 2025-ah khan chhimtu/tlawhtu mi 1,20,000 vel an awm a, Kût tawp zana Mualnuama concert chu mi 42,000 velin an chhim. Hnahsin Kût 2025-ah khan a hmuna stall neitute'n cheng nuai 200 vel man an hralh a; hotel, guest house leh homestay-te'n cheng nuai 140 vel an la lut. Hnahsin Kût vanga Champhai leh a chhehvela sum che vel chu nuai 2,000 vela chhût a ni.

HORTICULTURE MINISTER SAWI DANGTE

* Horticulture department hmalaknain Champhai district-a ṭín 375-a zauah sapthei chìn mek a ni a; sorkarin New Champhai-ah sapthei sawngbawlna a din mek.

* Sawhthing chìn leh thar tamah district zingah Champhai district-in hma an hruai.

* Champhai district-ah Ginger Processing Unit din turin DoNER Minister-in thutlukna a siam tawh a, a hmunpui atan Mualkawi thlan a ni; processing unit tê zawk dinna atan Zotlang, Vaphai leh Tualcheng thlan a ni.

* Sorkar laipuiah ministry pahnih/pathum an ṭangho a, Mizoramah pawh department ṭhenkhat - Horticulture, Agriculture, Cooperation, Rural Development department-te an thawkho dawn.