Educational Field Trip-ah zirlaiten Aizawl Sahuan tlawh

Environment Forest & Climate Change (EFCC) minister Lalthansanga chuan nimin khan Vanapa Hall kawt aṭangin National Wildlife Week vawi 72-na puala Aizawl Zoological Park-a Educational Field Trip nei tur zirlaite a vailiam a; 'A guide to Aizawl Zoological Park' tih lehkhabu a tlangzarh nghal.

Educational Field Trip hi ṭum thum neih tur niin, nimin khan Synod Higher Secondary School leh JL High School zirlaite tan an kal a; vawiinah Mamawii HSS leh Republic HSS zirlai telin, naktukah Mizo H/S leh Chaltlang H/S zirlaite an tel ang. Sikul pakhat aṭangin zirlai 25 leh zirtirtu pahnih zel an kal dawn a ni.

National Wildlife Week hi kum tin October 2-8 chhungin India ramah hman ṭhin a ni a, kumina thupui chu 'Connecting habitats, thriving wildlife' tih a ni. Wildlife Week chhungin ram pumah nungcha leh an chenna ramngaw humhalh kawnga inzirtirna beihpui thlak a ni a, Mizoramah pawh state pum huapin nungcha leh ramngaw humhalh chungchanga inzirtirna chi hrang hrang buatsaih a ni.