Aizawlah Leadless Pacemaker vuah a ni

Mizorama a vawi khat nan October 5, Thawhṭanni khan Civil Hospital, Aizawlah damlo pakhat, kum 67 mi chu Abbott AVEIR VR Leadless Pacemaker vuahsak a ni.

Civil Hospital, Aizawla pacemaker vuah hi cardiologist Dr Loncy V Lalzarliana leh Dr Isak Lallawmkima leh an thawhpuite'n an khawih a; damlo an buaipui lai hi Apollo Multispeciality Hospital, Kolkata-a Dr Uday Shankar Das leh Abbott company-a Cardiac Rhythm Management pahnih Sayan Chakraborty leh Laltluangkima Pachuau ten an enpui a ni.

Health minister Lalrinpuii tarlan danin, leadless pacemaker-ah hian kap (femoral) aṭangin catheter hmangin lung chhungah pacemaker dah luh a ni a, áwm (chest) zai hawn a ngaih loh avangin a hautak lo zawk. Zai hawn ngaia pacemaker vuah ṭhin ang chu battery-in kum 9-11 vel a daih a, Abbott Leadless Pacemaker chuan kum 18-21 vel a daih a ni.