Hmeichhiate chungchanga dan zirho

Mizoram State Legal Services Authority (MSLSA) leh All Mizoram Women Federation (AMWF) chuan nimin khan IPR Lianchhiari Rûnah 'Hmeichhiate chungchanga dan leh hrai zirhona' (Sensitisation on Women-centric Laws) an buatsaih a; Guwahati High Court additional judge Justice Helen Dawngliani'n a hmanpui.

Justice Helen Dawngliani chuan, India ramah Mizoram chu hmeichhiate dinhmun ṭhat berna state zinga mi a nih rualin, hmasawnna tur tam tak a la awm thu a sawi a, "Hmeichhiate tana dan leh hrai hi mi tin hriat atana pawimawh leh ni tin nunphunga hman nghal theih a ni a, hmeichhiate pawhin heng dan aṭangte hian mahni zawn ṭheuha mawhphurhna kan neihte kan hriat tel a ṭul," a ti.

Hmeichhiate chu eng dinhmunah pawh ding se, khawtlang innghahna lungphum pawimawh ber zinga mi an nih thu sawiin Helen Dawngliani chuan, "A bik takin in chhungkhura kan mawhphurhnate dah pawimawh thiam a ṭul a, englai pawha danglamna thlen theitu kan ni tih inhre reng ang u," a ti a; zirhona chuan rah ṭha a chhuah ngei a beisei thu a sawi.

Zirhona hi AMWF president Dr Jane Rinsangi Ralte-in a kaihruai a; mi thiamte'n Mizo Marriage & Inheritance of Property Amendment Act bakah hmeichhiate dikna chanvo leh cyber crime laka himna tur te an sawifiah a ni.