Digital literature & social media-in Mizo ṭawng a nghawng dan zirho

Pachhunga University College-a Mizo department chuan nimin khan an Seminar Hall-ah digital literature leh social media-in Mizo thu leh hla a nghawng dan zirhona, 'Tunlai thiamnain Mizo thu leh hlaa hnuhma a neih dan zirhona' an buatsaih a, Dr Lalhriatzuali Ralte, IAS-in a hmanpui.

Dr Lalhriatzuali Ralte chuan, khawvel thiamna ṭhang zel chu do tur ni loin, hman ṭangkai thiam tur a nih thu a sawi a, "AI lamah Mizo ṭawng dik leh ṭha zawk nei turin data kan dah luh tam a ngai a, chumi tur chuan zirlaite pawhin tih theih an nei a ni," a ti.

Zirhona hi Dr Enid H Lalrammuani'n a kaihruai a, Prof. Irene Lalruatkimi, Mass Communication department, Mizoram University-in thupui a sawi hawng. PUC principal Prof. H Lalthanzara leh Dr H Laldinmawia, PUC Mizo department ten thu an sawi bawk.

Seminar-ah hian artificial intelligence, Facebook, Instagram, YouTube, X leh digital/social media dangte'n Mizo thu leh hla a nghawng dan zir a ni a; mithiam eng emaw zatin thupui an sawi a ni.