KHAWTHLIR

MLA-te'n enfiah

Mizoram Legislative Assembly hnuaia Committee on Govern-ment Assurance-te chuan nimin khan Polytechnic Building, Thingkah leh Sports & Youth Services hnuai Sangau Field siam mek chu a hmunah kalin an enfiah. Committee-ah hian chairman chu H Ginzalala niin, member aṭangin C Ngunlianchunga, Lalchhuanthanga, K Laldawngliana leh TBC Lalvenchhungate an kal.

Hman dan tur rel

Nimin khan Serchhip bawrhsap Paul L Khuma hoin District Mineral Foundation (DMF) Governing Council chu an ṭhukhawm a, Serchhip district tana DMF fund tlingkhawm Rs 14,55,734 ṭangkai taka hman dan tur rel a ni a, rawtna hrang hrang lutte an ngaihtuah.

Cerebal palsy zirho a ni

Ministry of Social Justice & Empowerment hnuaia National Institute for Locomotor Disabilities (NILD), Aizawl Regional Centre chuan October 6, Thawhlehni khan 'World Cerebral Palsy Day' pualin RIPANS, Zemabawka nursing zirlaite pualin thluak lam natna avanga harsatna thleng 'cerebral palsy' chungchang zirhona an buatsaih a; thupui chu 'Unique & United' tih niin, seminar-ah hian mi 49 an tel.

Bawrhsapin vailiam

Nimin khan Mamit bawrhsap Suvigya S Chandra chuan DUDO pisa tual aṭangin Mamit khawpui chhunga ṭangkai taka kawng sira zuarte hman turin temporary shed a vailiam. Temporary shed hi Bana Kaih hnuaia District Catalytic Intervention Plan aṭangin Bawrsap leh Project Director te kaltlangin Rs 16,35,315 sengin 22 siam a ni a, heibakah hian UDPA directorate aṭangin DAY-NULM support to urban Street Vendors (SUSV) hnuaiah temporary shed (street vendors) 22, Rs 13,92,000 senga siam leh a ni. Temporary shed hi a hmang turte'n Rs 500 in an khul dawn a, thlatin Rs. 200 an chawi ve bawk ang.

Inziahluh tur

Aizawl Municipal Corporation (AMC) hnuaia Study Team on Regulation of Street Vendors and Vending Zone rawtna Board of Corporators Meeting-in a pawm angin AMC huamchunga kawng sira thil zuar (street vendors) leh dawr ak/ thil zuara kal kual (mobile) te chu December 12, 2026 hmain AMC pisaah inziahluh vek tur a ni.