Eirawngbawlna gas man bithliah thar

Indian Oil Corpora-tion-in eirawngbawlna gas (LPG) man a tihchhuah thar angin Food, Civil Supplies & Consumer Affairs (FCSCA) department chuan Mizorama gas man a bithliah a, October 1, 2026 khan hman ṭan a ni.

Gas man bithliah tharah hian inchhung-khura eirawngbawlna atana hman tlánglâwn domestic cylinder (kg 14.2) tih loh bûr dang zawng a man a pung a, domestic cylinder erawh July 2026 aṭangin a man a la danglam lo.

Mizorama eirawng-bawlna gas man hi chi hniha ṭhen niin, Mizoram luhka Vairengte leh Vairengte tih loh Mizoram hmun dang zawng atan a man ṭhen a ni a; Vairengteah hian Mizoram hmun dang aiin gas man hi a tlawm a ni.

FCSCA tarlan danin, Vairengte tih loh Mizoram hmun dang zawngah domestic cylinder man Rs 1,094 (Vairengteah Rs 1,085) a ni a; commercial cylinder man Rs 3,300 (Vairengteah Rs 3,285), XtraTej man Rs 3,322 (Vairengteah Rs 3,307.50) leh composite man Rs 787.50 (Vairengteah Rs 777.50) a ni.

Gas man hi home delivery kalpuinaah chuan a man pangngai aṭangin Rs 70 belh zel tur niin, point delivery-ah Rs 7.53 belh tur a ni a; distributor kudama hralh a nih chuan Rs 33.43 paih tur a ni thung.

Domestic gas cylinder man hi West Asia buaina vanga March 7, 2026-a sorkar laipuiin Rs 1,005 (Vairengteah Rs 996) aṭanga a tihsan hnuah a la tlahniam leh lo a ni.