Lui nungcha man phal loh hun

Fisheries department chuan hriattirna tichhuakin, October 10 - November 30, 2026 chhung hian Autonomous District Council areas tel loin Mizoram chhunga lui lian leh luitê zawng zawngah nghalim, nghadawl, dawnṭial, lengphâr leh sangha fuan dangte man khap a nih thu a tarlang.

Fisheries department chuan, Mizoram luidungah sangha fuan hun a lo thleng leh dawn ta tih a tarlang a, "Luidung nungchate an lo pun zel theihna turin nghafuan hun laia him taka an inthlahpun theihna turin Mizoram Fisheries Act, 2002 Section 5(1) leh (2) behchhanin Mizoram Governor chuan luidung nungcha man khapna hun (closed season) a puang a, closed season chhung hian luidung nungchate tihhlum leh an nunphung tihbuai a khap a ni," an ti.

Closed season hi October 10 - November 30, 2026 chhung a ni dawn a; dan bawhchhiate chu Mizoram Fisheries Act, 2002 hnuaiah lung-in tan leh pawisa chawi theihna a ni.