Intodelh Inzirtirnaah KM HSS che ṭha ber

Samagra Shiksha leh Tharthilthlentu (Tili) te chuan October 7, Nilaini khan Dawrpui Multipurpose Hall-ah Intodelh Inzirtirna Inter School Final hun an hmang a, School Education secretary K Lalthawmmawia'n a hmanpui.

Intihsiakah hian KM Higher Secondary School (Flashlight) chu pakhatna niin, lawmman atan nomawi leh Rs 15,000 an dawng a; pahnihna Thenzawl Senior Secondary School (Second A)-in Rs 10,000 danwgin, pathumna Saitual High School (Sunshine)-in Rs 5,000 an dawng. Top 3-te hian tangkapui (medal) leh thuchei an dawng tel.

Best presenter atan Lalchhanchhuahi, KM HSS (Flashlight) thlan a ni a, lawmmanah Rs 1500, hûnmawi leh thuchei hlan a ni. Bethlehem Vengthlang H/S, Thenzawl Senior SS, Central HSS, Saitual HSS, Serchhip HSS, PCR H/S New Serchhip, JM H/S Serchhip, Durtlang H/S, Republic H/S leh Keifang H/S aiawhte hnenah consolation prize Rs 1,000 leh thuchei hlan a ni bawk.

School Education Secretary chuan, zirlaite chu an zir chhuah hunah mi hnuaia thawk ni mai loin, mi dangte ruaitu nih tum turin a chah a, "Sorkar hnathawk kan la ngaihsan reng chuan kan la changkang tawk lo tihna a ni," a ti a; ruihhlo laka inthiarfihlim tur leh lehkha chhiar tam turin zirlaite a fuih.

K Lalthawmmawia chuan, Intodelh Inzirtirna final-a tel zingah mipa aiin hmeichhia an tam zawk thu te, Mizoram electoral roll-ah mipa aiin hmeichhia an tam zawk thu te a sawi a; KṬP leh ṬKP member thi zinga 80% vel chu mipa an nih thu te sawiin, "MIpa an thih tam chhan hi zu leh ruihhlo kaihhnawih natna a tam hle. Hei hi kan dinhmun a nih avangin kan hnam hian ral lam kan pan tihna a ni," a ti.

Intodelh Inzirtirna Inter School final 2026-ah hian School Education director Angela Zothanpuii te, SCERT, MBSE leh Samagra Shiksha officer-te an tel a; Education minister Dr Vanlal-thlana thuchah ngaihthlak a ni.