Kan culture leh hnam nihna humhalh chunga hmasawnna kalpui a ṭul - Prof. Lalnilawma

PHE minister Prof. Lalnilawma chuan nimin khan Aizawl North College-ah 'National Seminar on Youth and Culture in Northeast India: Intersections and Perspectives' a hawng a; culture leh hnam nihna (identity) humhalh chunga tunlai khawvel hmasawnna kalpui thiam a ṭul thu a sawi.

Prof. Lalnilawma chuan, seminar thupui 'Youth & Culture' chu tunlai khawvel nena inrem tak a nih thu a sawi a, "Ṭhalaite chuan music, fashion, literature, social media leh khawtlang nun hmangin culture an siam danglam mek zel a, hmanlai nunphung leh tunlai nunphung inlaichin dan leh danglam dante chu hriatthiam a pawimawh. Technology lama hmasawnna leh social media-te hian ṭhalaite nunah nghawng nasa tak an nei a, kan culture leh hnam nihna (identity) humhalh chunga tunlai khawvel hmasawnna kalpui thiam a pawimawh hle," a ti.

Social media leh artificial intelligence (AI) chungchang sawiin Minister chuan, "AI chu kawng tam takah ṭangkai hle mah se, a hman sual theihna kawngah fimkhur thiam a ṭul hle a, thu dik lo thehdarh kawngahte kan fimkhur a ngai. He seminar hi hmun hrang hrang aṭanga zir mi (researcher)-te inhmuhkhawmna hun pawimawh tak a ni a, a hlawhtlinna erawh chu zirlaite rilru sukthlek a nghawng danah a innghat thung," a ti a; India hmarchhaka chengte culture leh hnam nunphung humhalhtu leh a ṭha zawnga danglamna thlentu ni thei tura theihtawp chhuah turin kalkhawmte a chah.

Seminar hi Aizawl North College leh Christ University, Bengaluru ṭangkawp buatsaih a ni a; Aizawl North College principal Dr Saroj Laldinpuii, GCU Assam vice chancellor Prof. Kandarpa Das leh author&columnist Mitra Phukan ten thu an sawi bakah panelist - MPS & writer F Vanlalrochana, Zubaan executive director Bidisha Mahanta leh NEHU sociology dept professor Dr Kedilezo Kikhi-ten thupui thlanbik hmangin thu an sawi bawk.