Tuialhthei zawn hna thawh thlirlet

Nimin khan Commerce, Industries, Geology & Mining (CIGM) department bultumin Mizorama tuialthei zawn hna thawh mek Planning conference hall-ah thlirlet a ni.

Thlirletna hun hi CIGM secretary H Lianzela'n kaihruaiin, Ministry of Petroleum and Natural Gas, Directorate General of Hydrocarbons, Oil and Natural Gas Corporation Limited, Oil India Limited leh Indraprastha Gas Grid Limited hotute an tel a ni.

Dr H Lianzela chuan Mizoram chhunga lei hnuai hausakna lak chhuahna tura tunhma a hmalakna hrang hrangte chuan beisei angin hlawhtlinna la hmu lo mahse, Ministry of Petroleum and Natural Gas, OIL, ONGC leh CIGM dept thawhhona leh ṭanrualna zarah hmachhawp duhawm tak a awma a hriat thu a sawi.

Tarlan a nih danin, Mizoramah hian kum 2011 khan ONGC chuan lei verh hna hi a lo kalpui tawh a ni. Tun dinhmunah ONGC hian Meidum leh Zanlawnah oil well an verh tawh a, OIL pawhin Aibawk, Keifang leh Thenzawlahte hma an la tawh a ni. Hortoki khaw bula lei verhnaah hna kalpuina tura lirthei lian kal thei turin Chhimluangte lei thawmṭhat a ni.

ONGC-in kum 2011 -12 a Hortoki, Kolasib district-a gas an lo hmuh tawhna hmun aṭanga km 2 a hlaah exploratory well thar an verh belhlehna tur atana regularisation leh ONGC block no. AA-ONN-2001/2 extension-a nih theihna dan tur sawiho a ni.

Mizoram chhim lam, Rabung leh Tlabung lamah leh Palzawng - Thiltlangahte 'Gas Exploration' kalpui a pawimawh thute leh Panisagar - Sihhmui Gas pipeline kalpuina tura hmachhawpte pawh sawiho a ni.