MLA-in hnathawh tura ruahmante a tlawh

Aizawl South-I bialtu MLA C Lalsawivunga, minister chuan nimin khan a bial chhunga hmasawnna hnathawh tura ruahmante a tlawh.

C Lalsawivunga hian Bethlehem Veng kawngpui phei zauhna tur SASCI aṭanga ruahman leh College Veng, vengthlanga motor kawng inkalpawhna tur SASCI aṭang bawka ruahmante a hmunah enfiahin, hmalak thuai a nih theih a beisei thu a sawi.

South-I Bialtu MLA chuan, "Veng a ṭhang a, mihring kan pun zel avangin lirthei leh mipui kalna tur kawngpui sial leh zauh kawngah theih tawpa hmalak zel kan tum. Veng mipuite ṭawiawmna pawh kan ngen a, thawhhona ṭha tak kan neih ngei ka beisei," a ti.

Bethlehem Venga Sih Lui to Tuithiang kawng zauh tura ruahman hi metre 260 a thui niin, eng tianga zau tur nge tih enfel mek a ni. Tin, College Veng, vengthlang CP road aṭanga Aizawl by-pass road pawh tura ruahman pawh hna tan thuai a nih theih nan ṭul leh buaipui ngai buapui chhoh zel tur a ni.

C Lalsawivunga hian a bial chhunga kawng chhe lai PWD Aizawl Road South Division hnuaia thawm ṭhat turte pawh contractor-te nen en nghalin, kumin ṭhal chhunga thawh a beisei thu a sawi.